Coronavirus kong he pehtlai in tuchun ah India Prime Minister Nrendra Modi nih rampi zulhding phung cu a thanh. A chimmi cu a ra laimi May thla ni 3 tiang lockdown pehzulh a si tthan lai ti ah a thanh. A sinain April 2o hnu khin cun dor deuh in kalpi a si te ko lai tiah a chim chih. Chawlehthalnak (economic) mit in zoh ah cun ni 21 chung lockdown hmanh hi a faak ngaingai ko cang. A sinain India ram mipi nunnak hi tampi in a man a faak deuh. Cu caah hi zawtnak chung in mipi kan him khawhnak hnga lockdown hi pehzulh a si ko rih lai, tiah a chim.

 

Cun a chim chihmi cu hi bantuk in lockdown cu pehzulh a si ko lai nain nifatin i hlawhfa chom in a nungmi hna caah April 20 thok khin cun zeimawzat cun thlahdorh deuh a si te lai tiah a chim chih hi a si. April 20 tiang khi cu police station, district le state kip ah lockdown hi mipi nih tthate in an zul maw timi biatakte in zoh peng a si lai. Cu hnu ah thil umtuning zoh in zei tluk tiang dah thlahdorh ding timi cu tuaktaan tthan a si te lai tiah a chim. Ref: Vanglaini

Chap: Hi bantuk in India PM Modi nih zulhding cu fiangte in a thanh cang tik ah India ram ah a ummi Chin ralzaam pawl kan caah cun a fawi hrimhrim ti lo. A bik in New Delhi ah khua a sami Chin miphun hna caah a fawi lo. Delhi ah a ummi kan miphun hi a tlangpi in ramttha a phan cangmi chungkhar le hawikom hna sin ah thilkuat le web in thawngzamh in a paw ai cawmmi kan si hna. Cu hmanh ah cun mi tampi cu eidin khim ai hmuh fafang lawng kan si rih. May thla ni 3 tiang lockdown a si tthan lai tik ah mi tampi caah cun eidin ding ti le rawl le inn hlan man kong ah kan buai hringhren ko lai.