Lawmh um kho taktak.”Miphun hawi a harsami hna caah tiin, Hakha ah fancang tun 65 le Yangon pawngkam ah tun 20 cu Chinland foundation in bawmhnak kan pek khawh ṭhan hna caah kaa lawm. Kan mi hna rawlṭam cu kanmah rawlṭam a si ve.” Saya Thawng Tha Thang

Thawngpang dang: Arakan Army(AA) le SAC ralkap kar kahdohnak cu Paletwa le Yataetaung ah a chuak i, August 13 ah khan hmun li ah an i kap, tiah theih a si. Cu kahdohnak ah cun SAC ralkap lei 37 an thi i, hriamthil tampi kan lak khawh, tiah Arakan Army(AA) nih an thanh. August 13 ah SAC ralkap le AA hna cu Rakhine ram hmun 3 le Paletwa ram hmun khat ah fak ngai in an i kap, tiah theih a si.

August 13, zinglei suimilam 7:35 ah a voi khatnak kahdohnak a chuak i, Rakhine ramkulh, Yataetaung peng, Dungpait khua pawng ah SAC ramri hngak phufonh le AA hna cu suimilam 2 tluk an i kap. Cu kahdohnak ah cun SAC ralkap lei 31 an thi i, AA lei zong in hliamhma tuar an um, tiah theih a si. Kahdohnak ah SAC ralkap hriamnam 60mm pakhat, MA-3 (15), MA-1(6), MA-4(2), pistol pakhat, GPS lung hnih telh in hriamthil zeimawzat an lak, tiah theih a si.

August 13, a voi hnihnak kahdohnak cu Rakhine ramkulh chung, Maungtaw peng, Kyaukpadoe khua pawng ah chun suimilam 12:00 hrawng ah SAC ralkap khah-lah-yiah 270 le AA kar kahdohnak a chuak ṭhan. Kaphnih kar kahdohnak cu suimilam 1:30 tluk hrawng an rauh hnu ah SAC ralkap lei 6 an thi i, hliamhna tuar zong an tam. Meithal 4, hriamthil dangdang, sii-ai, le riahcaw hna zong an lak, tiah theih a si.

August 13, zinglei suimilam 11:30 ah a voi thumnak kahdohnak a chuak ṭhan. Cu kahdohnak ah cun SAC ralkap lei hriamngan, hriamhme hna le pistol 2, MG 43 machine gun pakhat, drone 2, Jammer 1, bomb phunphun, sii-ai le riahcaw bawm 30 leng an lak ṭhan, tiah theih a si.

August 13 ṭhiam ah Chin ramkulh, Paletwa peng, Tahtaykune khua chaklei ah kaphnih kar kahdohnak a chuak ṭhan. August 14 ah kaphnih kar kahdohnak um lo nain SAC ralkap nih August 13 i kahdohnak a chuahnak hmun cu hrianngan in an kah, tiah theih a si. Nihin August 15 ah SAC ralkap nih helicopter, tilawng le SAC ralkap motor ngan hmang in hriamthil le minung thazaang chapnak a tuah caah kahdohnak cu a fak chin kho, tiah AA nih cathanh an chuah.