Lunglawmhnak Authawng: Halkha Covid-19 Positive Kan Naunu Bawmhnak An Tuah Piakmi $840 Bak A Chuak Ṭhan Cang

Chin News

Atu lio online media ah thawngpangchia ngaihchitnak thawngpang tampi a um lioah a tu bantukin lawmhnak thawngpang ṭha taktak kan vun theih hi cu lung a hmui hringhran ko. Cucu zeidah a si tiah cun aho paoh nih kan theih dihmi nizan ah Halkha peng Tiphul khuami kum 18 nute cu a tu lio pulrai zawtnak Covid-19 positive a si tiah Kawlram ngandamnak zung nih official tein thanhnak an tuah. Cu caah ramchung ramleng ummi Chinmi vialte kan lau dih i, kan far nu te cu kan zaangfak cio i amah pumpak facebook cahmai ah maw siloah, kan far nute facebook cahmaiah hnemhnak bia kan chim cio hna.

Image may contain: one or more people and outdoor

Cu lioah amah kan farnu lila nih facebook hmangin ka ṭha tuk, ka dam tuk cang tiah a facebok a hung chim. Cu ko nih mi thinlung anuamhter i lungthin a damter. Cu lawng hlah cu bantuk thil a hung um lioah Australia, Melbourne khuasa mi Laimi tampi kan theih ciomi Olivia Nu Cinzah ṭhihruainak in Covid-19 positive a simi Halkha sizungah an zohkhenh liomi kan fa kan nau caah tiin bawmhnak an tuah piak. Lawmh a um tuk hringhran. Cu Olivia Nu Cinzah ṭhihruainak in bawmhnak an tuahmi cu a dihlak in $840 a chuak cang.

Image may contain: one or more people, people standing and outdoor

Zohchun tlak taktak an si. Mipi nih thei hna u sih ti ka duhmi cu hi bawmhnak an tuahmi hi aho nih fialmi le zei bantuk organization phu hmanh nih tuahmi a si lo. Australia, Melbourne ah a ummi Olivia Nu Cinzah ṭhihruainak in tuahmi a si. Cun hi bawmhnak a tuhi atu lawngin an thokmi a si i bawmhnak a pe duhmi kan um ve sual ahcun Olivia Nu Cinzah timi rak hmehpiak law pehtlaih khawh a si. Bawmhnak $840 an hmuhmi hi anmah pumpak nih an bawmhmi a si i amah pumpak, kut cung hrimhrim ah pek a si lai.

Image may contain: 3 people, text
Bawmhnak a tuahtu (Organizer) Olivia Nu Cinzah

A tu bantukin kan far zawnruahnak he bawmhnak a petu nan diklak cungah lunglawmhnak tampi kan ngei. Cun, bawmhnak a kan tuahpiaktu Olivia Nu Cinzah cung hrimhrim ah lunglawmhnak ngapi kan ngei. Hibantuk in midang zawnruahnak le bawmh duhnak thinlung, lungput le ruahnak a ngeihmi hi aho hmanh nih philh hna hlah usih law i cawn cio hna usih! Pathian tu nih a let za in thluachuahnak pe hram ko hna seh!

Admin hmurka: Hihi kanmah nih kan tialmi a si. Bawmhnak a tuahtu kan u nu Olivia Nu Cinzah siannak in kan thlahmi a si. Pumpak in bawmhnak apekmi atial chih caah kan rak langhter chih ve. Olivia Nu Cinzah timi facebookzong ah zohchih khawh a si. Cun hmanthlak zong hi amah siannak in ka tarmi a si. Kan farnu kan langhter chihnak a ruang cu bawmhnak apekmi a si caah a si. Zeidang ruangah a si lo. Bawmhnak a petu vailte Pathian nih a letza in thlauchuahnak in pe ko hna seh!

Leave a Reply