Naitan ah Malaysia ah inn dot cungin a tlak i a nunnak a liammi nungak Sui Hlei Ṭial cu malaysia in myanmar ram leiah a ruak tlunpi a si. Cuticun an rak tlunpi i, a chuahkehnak Thantlang ah an phak ah, Thantlang Covid-19 Main Committee nawlngeitu hna nih an rak kham hna.

Thantlang khuachung ah luhpi cu chim lo, Thantlan mual ah Lai phung tein a ruak vuiter an si lo. JCB in lamkam ah vawlei an cawh i, cuticun an phumter hna. Chungkhar lei nih nawlnak an tuah hnu hna ah, zaanṭim ah a ruak cu an cawh ṭhan i Thantlang thlanmual ah ṭhial ṭhan a si.

Ramchung, ramleng a ummi Chinmi kan lungfak dih cio. Cun, kan naunau Sui Hlei Ṭial bulhnak caah tiin, ramleng ummi Australia hrambunh, Chin Broadcasting Network (CBN) nih bawmhnak tuah piak a si. Bulhnak caah tiin bawmhnak an tuahmi zong a chuakmi a ṭhahnem ngaingai. Bulhnak caah tiin bawmhnak an tuahmi an hmuhmi hi Kyats 2,188,998.29 (ting kul le ting khat le thong sawm riat le thong kua deng)cu Pu Cung Hu (Hakha) sinin kuat a si cang.

Lunglawmhnak: Kan Farnu Sui Hlei Tial Bulnak Cu Kuat A Si Cang| Australia hrambunh, Chin Broadcasting Network (CBN) in kan farnu Sui Hlei Tial caah GoFundMe in bulnak hmuhmi AUD $2,460 = Kyats 2,188,998.29 (ting kul le ting khat le thong sawm riat le thong kua deng) cu Pu Cung Hu (Hakha) sinin kuat a si cang.

Hi ka hmun ah bulnak a petu hi minung 62 kan si i a dihlak in $2,534 a chuak. Asinain, GoFundMe lei in “Fee” an tan/laak hnuah $2,460 a taang i hi vial hi Laitlang ah kuat a si. Bu/pumpak hna zong in bulnak pek khawhnak lam tuah a si caah, kanmah lei in kan i tinh ning ($3,000) hi a chuak kho deuh lo. Cun, atu lio cu tangka thlen zong a niam tuk caah a chuakmi zong hi a tlawm deuh ngaingai.

Nihin ah kan kuatmi cu Pu Cung Hu nih hmun dangdang in a hmuhmi vialte he fonh in kan farnu Sui Hlei Tial – taantak chungkhar hna sinah pek/ap a si hruak lai. Dawtnak le zawnruahnak lungthin he bulnak a pechantu/ dawt kut a samhtu vialte nan cungah lawmhnak nganpi kan ngei. Bawipa tu nih a let in thluachuah in pe cio ko hna seh!

Kan farnu Sui Hlei Tial i a ruak cu thlanmual ah thial in phum/vui than si cang hmanhsehlaw, a tonmi, a tuanbia le a chungkhar nih an tuarnak hi cu zungzal in philh khawh a si lai lo. Pechantu vialte cung lunglawmhnak he, CBN Team[Australia]

Lunglawmhnak thawng-Tleicia nungak Sui Hlei Ṭial ngaihchiatnak hrawmpinak le bulhnak caah tiin bawmhnak an pekmi kong he pehtlai in The Chinland Post nih hitihin an taar langh,“The Chinland Post nih tleicia Nu Sui Hlei Ṭial (21) caah Ramchung/Ramleng Chin miphun nih ngaihchiatnak hrawmhmi (bulhnak) MMK 13,179,342 cu Hringtu a nu le Chungkhar sin ah tlamtling tein pekchanhnak tuah a si cang.

“2020 October 17 chun sml. 1:00 ah tlamtling tein tuah a si. Thantlang tuah mi pekchannak kong ah felfai deuh in thanh khawh chap kan i zuam lai,” tiah ramchung hrambunh media ngan pakhat a simi The Chinland Post nih cun a taar. Chirhchan: The Chinland Post

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtlei ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, kan ca a kan rel piaktu nan dihlak cungah kan ilawm. Upatnak he Admin