Hi thawng kan von theih cu lung a nuam lo i lung a fak khun. Khrihfa ram ah hi bantuk thil a hung can hi cu a poi tuk hringhran. Tutan i thawng kan rak zamhmi hi kanmah nih kan ruahnak in kan pulhdahmi a si lo. Liana Sailo timi nih Mizo group ah a taarmi kan von tar chinmi a si.

Mizoram Lunglei Farm sangah a ummi Khrihfa upa a ṭuan liomi Pu C.Lalhmangaih nih kum tlinglo unau pahnih a tlaihhrem hna tiah kan theih. A tlaihhremmi unau hna hi faphir an si tiah kan theih fawn. Zaangfak taktak an si. An chungkhar an ngaihchia in an lungfak tuk hringhran. Pu C.Lalhmangaih nih unau hna cu cacawn ninga ni ahkhan Petrol la dingin mawṭaw in a kal i cu ah cun unau hna cu a phurh ve hna i mawṭaw chungah a tu bantukin zaangfahnak zeihmanh ngei loin a tlaihhrem hna hi a si tiah kan theih.

A hramthawk ahcun chunkhar hna nih thil sining zeihmanh an thei rih lo. Asinain ngakchia unau hna cu a thaizing ah an unau te cun an ṭap len ti a si. A tlaihhremnak hna ah an chiaṭha a fah tuk ruangah zeihmanh an chim ngam lo tiah a chungle nih cun an chim. An chung le zong nih zeiruangah dah nan ṭah an ti hna zongah zeihmanh an chim ngam lo.

Zeiruangah dah cuticun zeihmanh chim loin nan ṭah ko an ti len hna zongah an chim ngam lo. A hnuah an chungkhar hna nih nan ṭahnak aruang nan chim lo cun kan in vuak hna lai i an ti hnu lawngah thil sining cu an chimh hna.

Tutan ah Pu C.Lalhmangaih nih a tlaihhremmi hna unau hna hi kum 6 hrawng minung lawng an si tiah kan theih. A tu bantukin kum tlinglo ngaikchia nih tlaihhremnak an ton cu mipi zong an lungfak ngaingai. Mizoram nu phu pakhat a simi ‘Mizo Hmeichhe Insuihkhawm Pawl’ (MHIP) nih phungning tein hremnak pek dingin palik sinah an ti hna. Charhchan: Mizo World News. Note: Hmanthlak hi google ta kan lakchinmi a si.

Vawleicung Ah A Linhcemnak Hmun An Tah. California, USA i a ummi Death Valley cu zarhpini zanlei ah khan 54.4°C a phanh caah an tahnak a dik ko ahcun 1913 in Vawleicung i a kihlum (temperature) an tahmi lakah a lincem a si.

1931 ah khan Tunisia ah 55°C a rak phan i mah cu a linbik a rak si nain a rauh hlan ah mah an tahmi kha a dik lo an ti caah cu rikawt cu an rak hnawh tthan. An tahmi rikawt tamngai hi a hmunkip ta an zohchih tikah an hnon thanmi an um.

Asinain tu kum hi hmun tampi ah a linh rikawt thar an um pah an ti. Vawleicung ah 50°C a phanhnak hi kum 2000 hnu ahhin a um len cang.

Death Valley hi minung khuasak lonak hmun lawng pakhat a si i a linhsat a tahtu company Furnace Creek cu zumhtlak ngai an si caah an tahmi hi a dik lai tiah an ruah. Mah tluk hin minung khuasaknak khua ah lin sehlaw a poi tuk ding a si an ti. Cc: NRK/ CBSNews| Foto: Reuters| Credit:Teirial Caṭialtu