Nugaknu Sui Hlei Ṭial  (kum 21) cu September 29 ahkhan a umnak Malaysia ram, Sungai Buloh khua ah inn dot 9 cungin a tla sual i a nunnak liam. A ruak cu a nulepa umnak Thantlang khua ah an kuat i nizaan kha Thantlang an phakpi nain atu bantukin khua chung luhter loin lamkam ah an phumter hna hi si.

Hi kong he pehtlai in nungak Sui Hlei Ṭial apu nih a chimmi cu,“September 29 ah Malaysia ah a thih tikah Malaysia tanzung le malaysia ummi Pa Bawi le Malaysia i chinmi bu (Malaysia chinmi aherhnak a bawmtu bu) pawl tlangtlak tawlrelpinak in a ruak cu Yangon phakpi a si.

“Yangon a phakpi ah sizung lei zong thawngthanh an si i, cuticun Yangon rak tlunpi a si. Sihmanhsehlaw, zaan in kan rak i thawh i zinglei Bungzung an phak ah zung lei nih an ka auh i ka va kal. Nan tlunpi kho lo, ruak nan vui kho lo ti a si. A zei si zongah tlunpi ding a si cang caah zaangfahnak tein nanmah nih nan ti ning tein Covid-19 vennak angki zong i hruk in, minung mah cu zat nan timi ning tein khuachung zong luhpi lo tein, thlanmual ah kan kalpi lai i ruak hi kan vui ko lai kan ti hna zongah an duh ti lo.

“Cuticun Pine zong nih an in kham ko hna lai tiah an kan ti. Cucaah Sipin chairman a simi Pu Ram Khar ka sawm i bawmh ka hal caah Thantlang in Hakha ahcun kan rak tlung. Hakha ahcun a herhning in kan tawlrel dih caah Hakha nih a kan thlah i cuticun Thantlang kan rak phan.

“Sihmanhsehlaw, tuhlan meeting kan rak tuahnak ah Sizung uktu pa nih an kan timi cu Sizungah ruak vuinak nawl ka hal hna tikah, Minung pali lawng kan hal lai tiah Aamah na khan kho maw? aw ka khan khawh ko ka ti. Asinain bia zong a ka let lo. Va chuak aherhmi cu kanmah nih aherhning kan tawlrel ko lai. Kan chim cia leng in kan pial kho lo a ka ti i cuticun kan i ṭhen.

“Ruak cu Thantlang kan phakpi tikah an kham i, kan nawl len hna nain, kan luhpi kho lo. Cuti an khammi thil an theih tikah khuami zong tam chinchin in an hung chuak i a donghnak ahcun minung kan tam tuk tikah, Sibawi le Ochohzihmu zong biakhiah ding an i harh tuk ve cang. Yangon leiin a kan thlahtu motor zong kir a herh fawn.

“Ruak kuang le chiah an duh fanw lo tikah, ruak cu ti i chiah peng awk a ṭhat lo caah zei si zongah i vui ko usih kan ti i i, Sibawi uktu pa nih cun lamkam ahhin nan duh paoh i vui ko uh an kan ti. Cuticun lamkam ahhin an vuinak a si,” tiah a Pu nih cun a chim tiah Salai Ngun San Aung nih a chim chin. Atanglei video ah tlamtling deuh in rak ngai.