Magwe ramthen, Ngape pengkulh, Zin Phyun Ohsuh Ma Kyi Kung khua ah Kawl Phungki pa pakhat nih Chin nu ngakchia (kum 13) lawng a si rih mi a sual pi ruang ah Phungki pa cu report an tuah cang tiah theih asi.

Hi thil hi October 9, 2020 ah a cang mi a si. Phungki pa nih hin Chin nu ngakchia te cu Phungki sianginn ah a hruai riangmang i a duh lo buin, hramhram in a sualpi chih hi a si. Phungki pa a cawlcangh ning le ngakchia nute a sualpi ning cu chungkhar lei nih an hmuh hnu ah an fanu te zong cu bia halnak tha tein an tuah. Phungki pa nih hin Phungki sianginn ah a ka hruai i ka duh lo bu in voi (2) a ka sualpi tiah ngakchia nute nih cun a nulepa sin ah a chim ve. Cu hnu ah chungkhar lei nih Phungki pa cu Police sin ah an report hi asi.

Hi kong a buaipi tu minung pakhat nih “ Police sin ka va phak ahcun Police pawl nih felfai biahal nak zong kan tuah ding cang i a dang dantatnak kong he pehtlai in tawlrel ding zong kan tuah ding cang tiah an ka chimh. Cu lawng si loin report kan tuah zaan suimilam 11pm ah Police nih Phungki pa zong cu an tlaih colh ve cang i lockup ah an chiah. Police sin kan phak cang tikah tuah ding a tampi. Ngakchia nute a kum zong an zoh fel ṭhan lai, cun tlaihhrem taktak a si maw timi zong Sibawi lei nih an zohfel ve rih lai, Sibawi lei nih cun ngakchia nute a chiaṭha an zoh cang i result kan hngak ko” tiah a chim.

“Ahmasa ahcun Phungki pa a chungkhat lei nih ting 10 in an rak lem len cang hna nain ngakchia nute chungkhar lei nih an duh lo, cun ting 30 an rak i ken ṭhan nain chungkhar lei nih an cohlang duh rih hna lo. Cu hnu ah report nak zong kan tuah lawlaw hi asi” tiah a chim fawn.

Phungki pa cu pohmah 376 in taza cuainak an tuah cang, a tu hi Police kut ah a mah cu a um rih ko. Sibawi lei result a chuah bak in a dang cawlcanghnak pehzulh ṭhan a si lai. Hmanthlak kan taarmi hi kanmah nih a remcanning in kan rak taar chinmi a si.