Kan fa kan naunu Lal Biak Zual  thil tonmi cu lungthin nih a celh hrimhrim lo. Zaangfak taktak a si ko. Lalbiakzuali(20) cu March, 11-2020 ahkhan pasal ngei dingmi a si. Asinain ruah lo tukin March 29- 2020 (nirukni)zan ahkhan zawt fahnak zeihmanh ngei loin a pasal ding Lal Mal Sawm nih mual a liam taak hi a si.

Lal Biak Zual nih a pasal ding Lal Mal Sawm cu voithum phone in call. A phone cu a ring peng ko nain atlai lo. A call tthan i a voili nakah nu pakhat nih phone call cu tlaih i a timi cu, “Atu naite bak ahkhan nan pa cu Civil Hospital ah an kalpi ee,” tiah zaan sml 8 ah a rak chimh. Zaan sml 8 ah cun achungkahr zong chimh ta manh loin a mo thuampi he cun, Civil Hospital ah cun a tli colh i, “sizung ka phak hlanah voithum tiang ka tlu,” tiah Lal Biak Zual nih cun a chim. Atlunak ah a khuk zong a phing dih.

Sizung a va phak ahcun a pasal ding cu a ruak in an rak chuahpi i, a pasal ding ruak cu a bawh hnawh colh i ,“a si kho lo e” a ṭah hnawh colh. A pasal ding ruak cu mawṭaw phurh a si i ahmaileiah khin va thu tiah ka ti i, tahbu cun “Ka duh lo, ka dawtmi hi kuh ka duh,” tiah ngaihchia lunghno ngaiin a chim. “Ka dawtmi, nang kanmah kan ngeih khawhnak ding le hmunkhatte i kan um khawhnak ding ah tah buiin ka nu hal ti zong kan chimh ko kha teh! na ka cohlanpiak i ziah atu ah hitihin na ka kal taak than kun ne, zeitindah um seh na ka ti,” ? tiah ṭahhla in apasal cu ahlawi i mawṭaw mangtupa he cun he mitthli tla buin le ngaihchia ngaiin kan um ve.

Lal Biak Zual hi kum 20 te lawng a si i, a pasal ding Lal Mal Sawm zong hi kum 22 chung a lut cuahmah liomi a si ve. Hi hna pahnih hi a firmi (zaammi) an rak si. Apa nih “hi hna hi an duh-dawtuk i, an pahnih tein hmunkhat ah an um ah hin thinlung zong a dam, zoh zong an nuam, cucaah cun i thitumhter lo ding an si hrimhrim lo,” tiin a hawipa sinah a saduhthah a chim. Cuticun chungkhar leinih lamkal an thlah hna i, kaphnih chungkhar nih hnatlaknak an tuah dih hnuah Monu ding Lal Biak Zul cu an khua leiah tlungin Monu hruk-aih ding ah tiah Aizawl ah angki an thitter dih. Pa lei chungkhar zong nih Monu lawmhnak ding ah Vok tiang an cawk dih cang. Ṭhitumhnak i hruk-aih Coat suith zong an thitter dih ve cang.

Hibantukin ngaihchiatnak kan ton tikah cun an pa ding a thih hlanah an pa nih a chim tiah an timi cu“ Nangmah nakin ka thih hmasat ahcun, ka thlanah Rose pangpar raangmi na rak chiah lai i, nangmah nih cun ka hmu kho hlah hmanh law, keimah nih cun ka rak in cuanh peng lai,” tiin rak chim ta. A thih hlanh February 26,2020 ahkhan Whatsapp Video call in an ichawn i a nupi ding cu mithi thutpinak hla tibantuk a sak hnawh peng tiah a nupi ding Lal Biak Zual nih cun a chim.

Lal Biak Zual nih cun an pa ding a dawtnak kong a chim ṭhanmi cu “A rak leng caan ah hin inn lawi hna i angeihlahtuk tawn i, kan ngai tuk tuk e, tiah a ka ti lengmang tawn. Innlei a lawi caan ah hin mangtha kan ti i inn leiah a lawi diam cang rua ka ti hnu hna ah a rak kir ṭhan i kuta hram ah voikhat-hnih hi mangṭha a ka ti ṭhan tawn,” tiah a chim.

Lal Biak Zual nih a chim ṭhanmi cu “Ṭhitumhnak thuam he hmanthlak ka duh e,” tiah a ti i, an khua cun a rak kir ṭhan i an pa ding thlanro cungah cun a Best Friend ding hna le Mopa kawi aṭuan dingmi hna he mitthli he March 11,2020 ah hmanthlaknak an ngei hna. Chirhchan: Mizo World News