Kum 2 tiang England ram London khuapi i sianginn a kaimi Singapore mi tuluk pa cu Coronavirus ruangah Mino phu pakhat nih an velh tiah amah Facebook cahmaiah a tarmi hmuh a si. Fimthiamnak ruangah London khuapi ah a ummi Singapore siangngakchia kum 23 mi Jonathan Mok cu February 24 zaan suimilam 9:15PM ah Oxford lam Tottenham Court Station pakhat ah “Miphun dang a si ruangah mino phu pakhat nih an velh” tiah amah aiawh i biachimtu The Straist Times nih a chim ve.

Velh a tongmi Jonathan Mok cu an velhnak hliamhma faakpi a tuar i a hmai le amit hrawngah hliamhma a tuar. Jonathan Mok nih a chim ve ning ahcun ” Oford lampi i ka kal cuahmah lioah mino phu hna lak i pakhat nih Coronavirus tiah a ka auh thawng ka theih i ka hnulei hoih in ka zoh hna, Mino phu chungin pakhat nih “Nangmah pa kha na ka zoh ngam ve tih!” tiah a ka ti i ka hmaiah a ka thongh colh. Cu cangka cun midang pakhat nih “Kan ram ah na Coronavirus kha kan duh lo” tiah a ka thongh colh ve. Pawngkammi hna nih an kham len hna nain an kham kho lo” tiah a chim chap.

Jonathan Mok a rak veltu Mino pawl cu palik an rak phak hlanah an zaam manh caah atu tiang rih ah cun an tlai kho rih hna loh tiah palik leiin thawng theih a si. Asinain palik lei nih cun hi misual rual Jonathan Mok a veltu hna mino phu hi a si khawh chungin tlaih khawh kan zuam hna lai tiah an chim hleiah Jonathan Mok an vuaknak pawng i a ummi CCTV zong zoh a si cang tiah an chim chap.

Jonathan Mok cu sizungah kalpi a si i accident le emergency department hna nih an chim ning ah cun a hmai i hliamhma a tuarning hi a faah deuh caah a hmai ruh tlawmpal remh a hauh lai caah Ah a hau lai tiah Mok cu an chimh. Jonathan Mok nih cun “Zeiruangah miphun dang le vun rawng aidangmi pawl nih nehsawh thlanglamh hi an tuar? Zeiruangah kan um sawhsawh komi cu tibantukin nihsawh le mi kut ka tuar? tiah ca a post i cu ca a postmi cu 3500 nih like an pek i 2000 nih an share cang,

“Miphun dang le vunrawng ai dangmi hna nihsawh le thleidan hi hruh ruangah si loin, huatnak ruangtu deuh ah a si. Hiti bantukin mi nehsawh le thleidan a hmang hna cu an thinlung chung i huatnak a ummi an i sum khawh lo ruangah a chuak tawnmi a si” tiah a chim.