Leitak- Hmawngtlang Kongah Ka Lungchung Biathli Phuang Ve Tuah Ning Keimah Min Cu Sui Len Tial Ka Si

Leitak- Hmawngtlang kongah ka lungchung biathli phuang ve tuah ning! Ka lungumbia tial ka duhnak a sau cang nain caan ka ngeihlo caah asi. Ka tialmi hi ka lungumbia sawhsawh khi asi ko. Keimah ka min cu Sui Len Tial ka si. Ka pa cu Hmongtlang khua asi i ka nu cu Leitak asi. Cucaah keimah cu Hmongtlang-Leitak ka si. Hi khua hnih kar i buainak a um tikah kaphnih in ka lung a fak (kaphnih ka ti caah, Hmawngtlang pawl-Leitak lei in a ttang ka ti hlah uh, zeihmanh ka chim rih lo hi mu). Hlanlio in ram ramkhat chungah i rem thipthep tein khua kan sak tti lio kha ngaih a um hringhran.

Kan khua le ram thanchonak khua kan ruah/khan/tuah mi pawl hi a tha tukmi an si ko nain midang lungfahnak a chuah ter tu asi ahcun cucu thil tha asi tiah chim awk a tha hnga lo. Kan ngakchiat lio i kan nu le pa nih an kan chimh tawnmi cu “mi pakhat thil na thenh ciami na lak tthan ahcun na taw a pit lai” tiah an kan ti tawn. “Taw pih” kan tih ruangah kan pek ciami lak than kan duh hmanh ah kan la than ngam ti lo. (asinain upa kan si hnu ahcun tawpih ttih ruangah siloin pek ciami lak than phung asi lo ti kan hngalhnak in asi cang).

Cun mi pakhat nih thil pakhat khat an kan thenh/pek tikah “afa/ atu chan” ah an lak than ti phun zong a um ballo i kan thei bal ve fawn lo. (Mah ti ka chim ruangah Leitak pawl – a pa khua lei in attang deuh ko, a bia in akan tongh pah ko hih ka ti ve lai u ci law, a tanglei hmanthlak ka hmuh caah thil sining ka chim bia asi).

Ka nu khua cu ka pa khua tluk in ka dawt ve i ka khua bantukin ka ruah ve( ka tuah khawhmi zeihmanh a um lo nain). Cun Leitak nih modern tuahnak kongah upa pawl nan cawlcangh lio 2009 – 2010 (Zipi khua ah sii-zungzi) nan rak tuah lio ahkhan zipi khua ah (keimah rian herh kongah) ka rak um lio asi i khuami cheukhat an chuak duhlo i tlang autu nih sau lak te a au lio ahkhan ka lung a rak thalo ngai.

Khuathum fonh in modern tuah hi rak duh cio hna sehlaw hmailei ah khuapi ah an cang hnga i Myo zong an pek hna hnga i a tha tuk hnga tiah keimah khuaruah in ka ruah len. (Modern tuah kha thazaang ka rak pek ngai ve i tuah hram a rak thoktu upa zong kha an ruahnak a kau tiah ka rak upat ngai hna).

Nain kum zeimawzat a rauh hnu ah tha ka rak pek ngaimi modern cu Hmawngtlang he an buai ti thawng ka theih cu lung a tha hrim lo. Nai tan lebang cu thisen i chuah tiangtiang dirhmun kan vun phak cu ngaih a chia ko. Zei ruang? Aho ruang? Zei indah aa thok? tbt… ah buai ti loin zeikhom asi ah a luancia caan cu a luan dih cang. A tangmi kan hmailei kar kan hlannak ah kaphnih in lungthumh kan duhlo ahcun kan khuahnih cungah Pathian lung a awi hnga lo. Credit: Sui Len Tial