Hi thawng von theih cu khuaruahhar a si rualrual in lawmhpi lo awk hrim a ṭha lo. Laimi tuanbia chungah a um bal lomi tuanbia pakhat a si tiah ka ruah. Chinmi tuanbia lawng hlah, Myanmar ramchung hmanh ah a um bal theng lai lo.

Lawngtlang khuami Pu Khua Tin Thang le Pi Rem Hlei Sung hna nih Halakha sizung ah faphir pahnih an ngeih tiah kan theih. An fale cu nu veve an si. Pu Khua Tin Thang le Pi Rem Hlei Sung hi a luancia kum ah atu bantukin faphir an rak ngeih i pa veve an si. A peh in faphir pahnih an ngei.

“A hmasat i an ngeihmi hna faphir unau hna cu Pa Duh Cung le Pa Duh Ceu an si i kum 4 an tling cang. Tutan ah ngeihmi faphir unau hna cu Mary le Martha tiah min an sak hna,”tiah an chungkhar neihniam sin in kan theih.

Laitlang an khuasaknak cu Lawngtlang ah a si i tutan nau an ngeih hi Halkha ah a si. An chungkhat neihniam sinin kan theihning ah, nizaan tiang cu Halkha sizung in an chuak rih lo tiah kan theih. Nufa hna zong ngandam tein an um khawhnak hnga thlacamnak in bawm cio hna usih.

Note: Chin World News Evening thawngzamhphu nih chungkhar neihniam sinah thawng kan hlat hnuah chungkhat hna siannak tel in hi thawng hi kan tlangzarhmi a si.