MIRANG NIH LIMIT AN KAN TUAHPIAK. 03/03/2020 ah SAM’S CLUB ah, Fang cawkding in ka va kal,Dawr chung ahcun ka kawl tawn i ka hmu ti lo hmun dang hna ah an chia hnga maw tiin Dawr Chung Rauntuantu kha Fang cawk ka duh le Fang cawkding a um ti ma?Na ka bawm kho la ma ka hei ti,zoh lem lo khin Fang a um ti loh,a dih,Truck in an rak phurh lio i zeitik a rak phak la ka thei lo tiin mihmaichia nawnpi khin a ka ti,cun kan pawng i a dirmi a tuanpi hawi nih cun a van ka thawh i Truck cu a phan cang nain Fang cu zeitik an thawmh lai ka thei lo tiin hmaichia nawnpi in a ka ti ve,keinih apoi lo ka lawm thaizing ah ka ra than te la ka ti.

Thaizing ka va kal than tikah cun Fang an chiahnak cungah,anmah Dawr chungah thil cawkkhawhnak CARD a ngeimi Minung pakhat nih Fang dip cuzat lawng Ni khat chungah cawk khawh a si timi Limited an rak tial.
Ka hei chuahpah ah Cashier ka hei hal i zia Fang cawk khawh zat limited nan tuah ka hei ti. A ka lehmi cu Mi pakhat nih tam tuktuk an lak i cawk awk ting lo in a lawimi an tamtuk le kan tuahnak a si a ka ti ko.

Mirang hi cu an lungput,an khuaruahnak hi a rak kau deuh hrim ko i Midang zawn hi an rak ruat hrim deuh ko. Kanmah tein thil i hrawmnak hmanh kan tuah lo lio ah, thil kan i hrawmkhawh nakhnga,tluk cio,Utinnauzo cio in kan co nakhnga khua an kan ruah piak. Culak laiah US i kawl si hna seh Laimi si hna seh,thenkhat Dawr ngeimi hna cu CORONAVIRUS hi caan tha ah i lak in an zawrmi Fang man an kaiter. Mirang lungput le kan lungput hi cu a rak i thlautuk hrih ko hi. Credit: Mang Za Nawl

Lunglawmhnak Thawngpang ttha taktak: Thawngpang ṭha taktak a si hih. Atulio thawngpang chia lawngte kan theih lioah Chinmi chungah a um bal lomi thawngpang ṭha taktak kan theih. Ramdang ummi kan fa kan naule tete miphun dang tampi nih an kai lonak hmun ah a sianginn a kaimi an tam ngaingai cang. Hihi Pathian thluachuah phunkhat a si tiah kaa ruah. Chin tlangval minote pakhat cu thlapa cung a kai hmasat bikmi Neil Armstrong sianginn a rak kainak Perdue University ah sianginn kai ve ding in full scholarship a hmu tiah theih a si. Perdue University hi US ram chung Top 10 Engineering University ah aa tel ve mi sianginn ttha taktak le mithang taktak pakhat a si ve.

Top 10 Engineering University chungah a tel vemi Perdue University ah Provost’s scholarship a hmuh pinah vawlei cung minthang Ivy League University zong nih anmah sianginn ah sianginn kai ding in interview an tuah rih tiah theih a si fawn. Tutan ah Provost’s Scholarship a ngahtu Chin tlangval pate a min hi Salai Paw Paw Khin Ma ti a si. A chuahkehnak cu Chin ramkulh Mara, Aru khua a si tiah kan theih. Tha tein le tluang tein a kai khawh ah cun thlapa cung kai khawhnak caan ṭha ngei ti u sih law kan palh lai lo. Kan Chin miphun chungin hibantukin kan mino tete nih minthatnak an hmuhmi hi asunglawi tuk hringhran lawmhpi cio hna u sih!