Lawmhnak mitthli a luang: Pastor Van Biak Thawng telh in ralkap nih an tlaihmi hna an thlah cang hna

Chin News

Thawngpang ṭha-Pastor Van Biak Thawng telh in Matupi ah kawl ralkap nih an tlaihmi hna cu tuzaan March 13, 2021 suimilam 11:00 PM hrawngah an thlah ṭhan cang tiah thawng kan theih. Lawmh a tuk hringhran. Asinain, hliamhma an tuar maw tibantuk an cungah zeidah a cang timi langhter a si loh.

May be an image of 5 people and text

Tutan ah an tlaih i an ṭhanmi hna hi Matupi ah Pastor a ṭuan liomi Pastor Van Biak Thawng le khuami hna chungin Sai Nawlar, Swam David le Salai Amon hna an si i kan hnulei March 10, 2021 ahkhan tlaih an si i Pastor Van Biak Thawng hi Biakinn i thlacamnak in a lawi leiah an tlaihmi a si i tuzaan ahcun an pathum tein an thlah cang hna.

Tutan i an tlaihmi hna kongah tuni thawngpang a ummi Chinmi vialte lau lengmang in a kan chiah dih. Cucu zeidah asi kan ti ahcun, khuami (khua upa) hna nih thlah piak dingin an nawl hna nain an ralkap lei nih cun nithum hnuah thlah ṭhan te dingin an ti nain an thlah hlei hna loh. Cun, an tlaihmi hna chungin Swam David thil puan ah thisen aa nehmi cu tuzing ah chungkhar ralkap lei nih an peek hna ti thawng kan theih dih cio lai.

Cu nih abikin Chinmi lau tuk a kan chiah. Nain, tuzaan ah an thlah ṭhan cang hna timi thawngpang kan vun theih cu lung a hmui taktak. Amahbelte zei bantuk dirhmun dah an um le an hliamhma an pu maw ti bel langhter a si loh. SHARE in rak kan bawm ve. Chirhchan: The Hakha Post/Matupi Times

Leave a Reply