Gym a tuahmi pa nih 250kg a cawi lio bak ah a ke kiak, ttihnung hringhran. Video zoh chih

 

Russia ram Khabarovsk ah a ritmi cawi khawh i zuamnak a um i Yaroslav Radashkevich timi pa cu 250kg a a cawi lio bak ah a ke kiak sual, video ah zoh tikah tihnung hringhran ko.

A ke kiah hnu in siizung ah an tlikpi colh, a nunnak caah cun tihnung a si lo. A dam than colh ko lai ti a si. Anih hi gym tuah ning a chimhtu personal trainer a si. Hi hnu cun a ritmi zong cawi ngam dawh a si ti lo. Yaroslav Radashkevich nih 250kg cu a keng ah a chiah i a dir, thut ai timh lio ah khat lei a ke kiak i a tlu. A ke cu zoh ngam lei a si lo, a fak taktak lai. Gym tuahnak ah a rit tukmi cawinak in ke le kut ai hrawhmi an tam ngai cang, an ruh nih a in khawhnak leng in a ritmi an cawi caan ah an ruh a kiah tawn hi a si. A tangbik ah video um lai. Daily Mail

Relchih. Cawnpiaktu Nakin Theihthiampiaktu Kan Herh Deuh: Minung a simi paoh nih lungrawh, lungfah le ngaihchiat timi kan ngei dih. Vawlei hi a tlin lo bantukin kan nunnak (life) hi a tling kho ve lo. Mi rum bik pa zong a chawva ruangah a lungre a thei peng i misi fak bik pa zong chawva a kawlnak ah a lungre a thei peng ve ko. Chikkhat caan chung cu chungkhar nuam ngai in kan um i hawi herh lo bang kan um caan a um tawn ko nain tthen caan khi a phan ko lai. Mi zei bantuk fa hmanh hi aa nuam zungzal bal lo. Tlin lonak vawlei ahhin a leng pengmi kan si.

Cu bantuk hawi ton ciomi fahnak le kan nunnak chungah a cangmi kha fak tukin kan ruah a si ahcun lungrawh, lungdonghnak le ngaihchiatnak pawl kha zawtnak (depression) ah a cang. Lungrawh le lung dongh paoh hi depression ngeih a si tinak a si lo, mah ti na um paoh ah ka ngei rua ti zong i ruat fawn hlah. Depression ngeih ahcun rian ttuan zong ttuan khawh a si lo, ttuan lo awk a tthat lo i i thawh dah ti lo cun. Depression timi cu a thuk tuk i fiang ngai ngai hmanh in hrilhfianh a harmi a si. Cancer ngeih kan ttih bantuk depression ngeih zong hi a ttih bakin kan ttih awk a si i, kan ngeih hlan tein zei bantuk thil ka cung a can sual zongah fak tukin ka ruat hrim lai lo tiah kan um hi a ttha tukmi a si.

Kan i ruah lo tuk in thil a can i kan lungrawhnak, kan ngaihchiatnak le kan lungfahnak kha a ni le caan a liam lengmang i zawtnak phun ah aa sem sual a si cun cu kong chim cu na ning zak hlah. Mipi sinah chim ngamh lo zongah nangmah an neihniam biktu sinah chim i zuam law chunglei tuarinnak khi leng ah kan chim cun a dam deuh tukmi a si, cucaah chim i zuam ko law na lung a dongh lomi nih fak piin an bomh lai.

Chan hi ai thleng tuk cang le sining hi an sang tuk cang tikah kan caah lungrawk thil a simi hi a karh chin chin lai, hawi sining kan tluk lo ruang, cozah phung kan zulh thiam lo ruang, ngaknu tlangval i hlenthawinak ruang, chungkhar i tukvelh a tam tuk ruang, hawi rian ttha an ttuan i rian kan hmuh khawh ve lo ruang le kan dawtmi hna nih an kan liam tak ruang i ngaihchiat tuk ruang tiin lung dongh thai hi a fawi tuk. Lung hi voi tampi a dongh ahcun zawtnak ah a cang kho.

Cu tikah kan herh cem dingmi hi cawnpiaktu an rak si lo, theihthiam piak tu an rak si. Mah ti ka ti tikah cawnpiaknak hi a herh lo ka tinak a si lo. Depression a ngeimi hna hi pastor te, counsellors te, doctors te le thiamsang (specialists) pawl nih an khamh mi hna nakin pawngkam theithiam piaktu ngeih ahhin khamh khawh deuh an si. A bik in hawikom dawtu ttha ngeih hi a si. Cun chungkhar theithiam piaktu ngeih hi a biapi khun rih. Depression a ngeimi minung hi khrihfa nun zong a si lo, mi tthawng lo tuahmi thil a si, Pathian i tlaihchan uh, nan thlarau thazaang a der,

Khrihfa hna nih cun tiah chim hlah, cawnpiak hlah, mah nih khan a pelte zong thazaang a pe hrim lai lo. A zualter chin lai. Cawnpiaknak nakin, theihthiam piaktu si hi i thim deuh hna u sih law cucu thil ttha deuh a si. Zawtnak a si caah zawtnak cu ziah na ngah tiah ti awk a si lo. Pathian i tlaihchan seh law mu ti zong a herhnak a um lo. Depression ngah le Pathian theih lo ai pehtlai lo, cancer ngeih i Pathian na thei lo ti he aa lo. Nunnak i lak belte hi cu biadang a si ve ko i hi kong cu keimah le nangmah nih bia khiah awk kan ngei lo.

Depression hi dam khawh a si ko. 100% in dam khawh a si ko, theihthiampiaktu nakin cawnpiaktu le mawtchiat tu kan tam deuh caah hin a tam u cu dam kan i herh tuk. A dammi belte hi an tlawm. Theihthiam piaktu hi kan herh pengmi a si caah na hawikom, na unau, na nu le na pa, na fa le kha ni 3 nak cung leng chuak duh lo le thil zeihmanh tuah zuam duhnak a ngeih ti lo i zawt ttung lo i rawlei a duh lo ahcun nunnak khamh dingin Pathian nih ttuanvo ngan bik a ka pek i lungsau tein le nem tein zohkhenh dingmi ka ngei cang ti va philh hlah. Midang nih cun kan theihthiam piak kho hna lai lo caah kan mah pawngkam a ummi cio te hi kan i zohkhenh thiam i “Dawtnak” timi hmai kan fonter ahcun kan zapi in kan i khamh khawh lo zongah pahnihthum tel kan i khamh kho lai i cucu miak tuk a si ko.

Note: Nini khat cu na fa lila, na hawikom ttha bik lila le nangmah lila hrim kha hi chung hin na um kho ko. Cucaah thlarau lei le thluaklei zong in timhcia tein um i zuam ko. Bawipa nih cun a tei cia dihmi a si ko. Credit: Nusung Hrangtlung