Lairam khuate sifak caah ka ti khawh tawk bawmhnak. Har ngai in na kawlmi na phaisa kha zei hrang na hman ah dah na lung an lawmhter? Man fakmi motor, branded thilthuam or Rolex suimilam hna nai cawk ah khin lunglawmhnak taktak na hmu el maw? Asilole, miharsa na bawmh ah zeitluk lunglawmhnak dah na hmuh? Mah biahalnak hi keimah tein kai hal lengmang. Thil manfak kai cawk caan ah lunglawmhnak taktak ka hmu kho lem lo. Nain miharsa ka bawmh khawh caan ah cun lunglawmhnak taktak ka hmu kho, midang zong an i lawm fawn.

Atu hi MMK 10,000,000(ting zakhat) hrawng dih in Hakha le Thantlang peng khuate harsa bawmhnak pek kaa tim. Hakha peng ah khuate 68, Thantlang peng ah khuate 85(total 153) an um. Khuate pakhat ah harsa deuhmi inndawng 3 cio thim in 20,000 cio pek ding a si(153*3=459; 459*20,000 =9,180,000). Rian a tuan kho ti lomi, ramtha ah chungkhat a ngei lomi, nuhmei, tar le pum tlamtlinglo papek an si lai. Khuate kip ah ka riantuantu an kal lai i khuabawi le pastor ruahnak hal hnu ah a harsa taktakmi lawng bawmhnak pek a si lai. Siaherhnak lungthin he pumpak phaisa bawmhmi a si caah khuate khuabawi le pastor hna zong nih miharsa dawtnak lungthin he nan kan tawlrelpi nak lai kan sawm ko hna.

Mah le chungkhar uu-saa pek timi um hram hlah seh. Khuate ah rian a tuan kho ti lo i ramdang zong ah phaisa cah ding chungkhat a ngei lomi sifak an tampi. Anmah caah cun phaisa laknak lam dang a um lo caah 20,000 te zong hi thahnemnak tampi a um lai ka zumh. Salai Lungthli Tum