Laipa Nih US Ummi Mirang Atu Lio Buainak Kong Biaruahnak A Ngeih Thil Sining Fiang Tein A Chim Dih

Hmuhning

By James Ceu

Atu lio Lamzawhnak kong ah US mirang ka hawipa he i chawnhnak; phone cakuat a sau bik ka ton a si. June thla a chuah hlan tiang cu atu lio US sandah piahnak kong ka zoh bal tuk lo, an thahmi Floyd video le sandah an piah lenmi hna video zong ka zoh bal lo, asinain tlawmpal cu ka hnaki ah a leng i ‘a herh lem lomi’ an tuah tiah zeirel lo ngai in ka um ko. Asinain ka lung ah a chuah tnaw bantukin Seattle ummi Atlanta i sianginn kaipi hawi mirang ka hawipa pakhat cu phone cakuat in ka hei chawnh i, a tang lei bantukin bia kan i ruah i, phone cakuat in word (biafang) 378 bak cu voikhat cakuat ah a ka kuat i, a ka hrilhfiah duhmi cu ka fianpiak ngai tiah kai ruah.

Keimah:Hello kawipa na dam ma? Nan umnak sandah piahmi an um el maw?
hawipa:Ka dam lio a si. An um len ko hna. Amah belte atu sandah an piahnak he suimilam pakhat kal tluk ah ka um ee. Nannih lei teh zeidah nan lawh?
Keimah:Kan pawngkam cu a um tuk lo, khua fa deuh kan si caah si lai.
Hawipa: Aw a si hrim ko!
keimah: Van in hal ko ning law, nang teh zei lei ah dah na dir, na tel bal ve maw?
hawipa: Tuan deuh ah cun ka rak i tel ve, atu lawlawse belte cu kaa tel lo. Atlanta ka phak tik lawlaw ah ka piah ve te lai. Atu hi Seattle ah i tel ve ding in kaa tim nain, Atlanta ah June 4 khi kal ding ka si caah, a karlak ah hnahnawhnak ngei lo ding in kai tawlrel, Atlanta tu ah cei tein kai tel te lai.

Keimah: Aw a si hrim e! Zangfah tein hi Sandah piahnak hi zei tluk in a biapit le zei ruang ah dah piah a herh timi hi sau deuh tein na ka hrilhfiah kho hnga maw, kaa fiang tuk lo i?

hawipa: Siseh, ka si khawh tawk in kan hrilhfiah lai. Hi sandah piahnak hi nai ah thahmi George Floyd kong in ai thokmi a si. Ameirkan tuanbia nih hi bantuk Palik nih kutkhit komi thah timi hi a tam ngai cang, cucu a ruang huaha um loin minak sinak ruang ahhin a si bik tiin theih a si. Cu pin ah cu bantuk i thahnak a chuahpitu palik pawl cu an i tlakmi dantatnak he aa tlakmi in dantat an si bal lem hna lo. Biaceih zung zong ah an kal huaha lo i an rian zong ttuan tthan ter an si lengmang hna.

Atu nai i Floyd a thattu pa zong kha kum tlawmpal a liammi ah Amerikan minung bak a rak that baltu a si. Asinain chimtlak dantatnak an pe lo i atu bantukin a rian an ttuanter tthan ko. Hi bantuk thil hi kan hmuh le kan theih hi a tlawm ti lo caah Amerikan mipi hi kan lung a si hrimhrim lo i dinfelnak tling (justice) hi kalpi a si lo timi kan i fian ngaingai nak a sau cang. A sullam cu, sualnak a ngei lomi Amerikan minung hi Palik nih duh paoh in thah khawh a si tibantuk boruak aa sem.

A hlei in, minak hna hi palik kut in thih khun a si – miphun thleidannak a ngeimi palik le an si dingning leng in kutke cian deuh in hman ding ah tindan a petu palik lei rianttuannak zong hi a si. Sandah a piahmi hna hi an i tinh bikmi cu palik reform (remh) tuah hi a si. An training tuah ningcang remh, ningcang tein tlaihkhih mi an zohkhenh hna ding kong (kutke hmang tuk lo ding), cun mi an thah tikah an i tlakmi dantatnak pek an sinak hnga tbk pawl an si. Cun a corrupt (a hman lomi?) phunglam (system) ruangah a zaza in thahmi minak le vun eng pawl nih dingtein (justice) biaceihnak an co dih khawh nakhnga hi a si fawn.

Cun, Amerikan palik hna hi ralkap lei pungsan in mersan cuahmah an si, ralkap lei thilthuam zong tampi an hman lengmang cang, cucu hriam a keng lomi rammi tlaih le khihnak caah cun a herh hrimhrim lomi thil bak a si. Atu tan sandah a piahmi hna zong hi palik nih cian tuk in kut an zao colh tikah cu hrimhrim cu mipi thin a phawh khun i Sandah piah a herhnak hi a fianter chinchin. Atu tiang zoh khawh ning ah a linsat ning a cian lei in a si i daite le tluang tein a dong ding cu a si ti lo.

Amerikan nih hin atu bantuk sandah piahnak le cawlcanghnak hi kan hmuh lengmangmi thil zong a si lo i, micheu nihcun atu bak hi Amerikan sersiamnak (revolution) caan a si tiah an zumh. A ruang a fiangmi cu kan cozahpi hi fiang tein a a corrupt (a pial sual?) cang i, chawlehthalnak zong nih mi tam-u a hruai kho ti hna lo. Atu sandah piahtu hna hi a kum kum in micheu ca lawng ah a tthami system nih fahnak a chuahtermi dong ding ah a domi hna an si.”

Leave a Reply