Ka Pi Na Rak Kan Daw Taktak rua Lo Ee: KA PI kan in zumh tluk le kan in bochan tluk in na rak kan daw taktak rua lo hlah maw. Na ca ahcun thih ngamh in pei kan cal ah, Awtaw puansen kan i ttem i ralkap zenthawng lak ah kan rak in dir pi kha. Tlangcungmi kan caah zalonak kong na rak kan chimh lio kha, van tong in pei kan rak in bochan cu. President na si khoh lonak 59(f) remh nakding lehhmat Million 12 a herh na ti ah khan, saaral lak ah kan rak in kawl piak, kan rak in tthut piak. Atu cu Predident nak sang deuh tthutdan ah na tthu kho cang le na kan herh lem ti rua lo ee.

2015 thimnak ah khan ruahchannak nganpi he na caah tiin kan hngetee cu cati ang ah kan rak hnim ve. Liam cikcek (landslide) in teinak na hmuh bak ve ko. Kan hei i lawmh ning kha a mak. 2015 hlutdaw cu nan ot. Zei ko dah an ceih hnga tiah ka hnabei a sei dom. MP thlahlawh 500,000 in karh siseh tiah Bia Suu an chuah i, kanhkuat tu um lo bak in an kut an tlir dih. A lawm um ko kan ti. Pu Thei Sein chan lio i, bicycle cit in hlutdaw a rak kaimi na MP hna nih nangmah chan ahcun Mercedes an in hauh i, cit cawk lo tiang na pek ko hna.Tlangcungmi hna nih cun zei ko dah na kan pek te hnga tiin kan in ruahchan. Kan herh lem lomi Aung San Milem cu tlangcungmi khua kip ah na kan hneek.

Ralkap chan lio i, an rak kan ting mi ram le vulei vialte cu na kan kirh piak than te lai tiah pei kan rak ruah cu. Nang hna nih cun ram le hmun, inn le loo cu na kan ting lai tiah zan mang hmanh kan manh bal lo. Azeee, nan rak zual deuh ko lo hme maw. Kawl rawn thok in kan Chin ram tiang pei nan kan chuh thluahmah ko ne hi. Kan Pu Thei Sein nih Tlangcungmi hriamtlai phu he Daihnak Zalonak caah NCA lam a sial lio ah khan Lethmat tthu colh hlah u, khua fak deuh in ruat ta uh tiah na rak thloh hna kha mu. A tu ahcun nan duh hrimhrim awk asi na ti hoi cang.

A hlannak in NCA zong an loo hma a kal ti lo, ruahchan awk cu a hla chinchin ko lo hme maw. Kan Unau a si mi Tlangcung Hriamtlai cheukhat hna cu an ci hmih ding in nawl a pek hna an in ti cu teh. Kan khuaruah zong a har viar.A hlan Ka Pi na loo ti lo in ka thei. Tlangcungmi Zalonnak (တုိင္းရင္းသားအေရး) le Federal biafang na chim lem ti loh. Na dai ngai ko. Na kan deh hlah maw ti awk in kan ruat pah cang.

Cozah budget a herh poh ah ngun khuai (Tax..15%) karh nan policy hi sifak kan nih ca ahcun vava kan tum ko hih. A tu lebang ahcun electric mei zong kan vaang ngam ti lo, mui lak ah khua kan sa ko. Bangla Kala ralzam ca ahcun inn le lo, ti le mei ciasa tein na khaang piak hna. Tlangcung mi Karen, Ka Chin, Shan etc.. le Paletwa kan Chin ralzam hna ca ahcun Inn loo chim hlah na bia-ann kaakhat te hmanh kan tong rih lo hi mu.

A tu ceo ah Phunghram pi siamremh dingin nan au lengmang mi zong hi 2020 election tik mipi nih an in vote nakding nan naing-ngan-zi (မဲဆြယ္) nak asi ko lai tiah kan ruah hna ko lo maw. KA PI kan in ruahchannak vialte cu minmei bang an lo ko e… Chun lai ah Ni a Tla.Kei zong ka miphun ka semnak ram Chinland ah ka kir ve cang lai. Mah le ram miphun sin i khuasak cu kan sifah zongah a poi lo kaa nuam deuh ko lai.

Ka Pi a zeipoh va si kun kaw, kan Rampi ca ahcun kan bochan rih ko lai. A dang bochan tlak ngaingai zong an um hlei lo. A mah balte Ka Chin Miphun caah ka ti khawh tawk tein ka dirkamh phot rih lai. Ruah zia rak ka thiam law kalawm ko lai.  TIME TO CHANGE na rak ti bang TIME TO CHIN asi ve cang ee!Credit” Jacob Thang