Malaysia ah ralzaam dirhmun in a ummi Salai Khrih Daniel UN Card ngei lomi kum 25 cu February 10 ah sizung ah a lut i thahri dik lo ruangah Serdang Hospital i rian attuannak an Boss (pupa) nih a kal pi a zawtnak an check hnuah Thi Cancer a si ti an hmuh.

Khrih Daniel hi Malaysia ah unau chungkhar ngei lomi a si ruangah FRO nih a umnak sizung ah kal in a konglam kan dothlat tikah a zawtnak hi ttihnung tuk cangmi a si i tha tein zohkhenh a si lo ahcun 100/80-90% dirhmun ah a dir. Serdang Hospital ah Cancer tuamhlawmnak an ngeih lo ruangah Sizung dang ah Cancer tuamhlawm/zohkhenh khawhnak Cozah sizung dangdang ah kan hal hna in an kan cohlang lo.

“Private sizung ah thlopbul na hau i cu thlopbul nak ah cun phaisa tampi a dih lai tiah kan chim i a lungdong tuk hringhran. Bawmhnak zong a si khawh chungin kan kawlpiak lai kan ti tikah bawmhnak hal dingin a thlachiat a ningzah ruangah sizung in chuah dingin kan theih lo karah minthutnak a rak tuah. FRO nih cun a dirhmun kan theih fian tikah si ti kal taak khawh a si lo ruangah February 13 ah Pathian bochan buin le Malaysia ah a ummi kan miphun hna bochan buin HUKM Private sizungah kan kalpi.

HKUM ah a zawtnak (biopsy test) ttha tein checknak an tuah hnuah thi rang (white blood) Cancer a si ti an hmuh tthan. Doctor nih ttha tein zohkhenh le tuamhlawm a si ahcun a dam kho dirhmun ah dir” tiah FRO lei nih an chim. Thla 6 chung nifatin sii a phunphun zohkhenh aherh i tangka fangin RM 40,000-50,000 hrawng a dih lai. Atuhi HUKM sizungah aa thopbul cuahmah lio a si.

Khrih Daniel bawmhnak ding ah tiin Lucky Ticket kan tuah i nan kan cawkpiak in nan kan bawmhnak lai kan in sawm hna. Ticket hi Fellowship (Biakinn) kipah le FRO Office zungah cawk khawh a si. Tangka in a bawm khomi kan sual ahcun amah sinah le FRO sinah pek khawh peng a si. A konglam theiin bawmhnak petu an um pah cang. Bawmtu nan zahte cungah luglawmhnak tampi kan ngei Pathian nih nan herhnak cio ah a letin thluachuahnak in pe hram hna seh! A min hi Khrih Daniel a si i amah hi kum 25 minung a si. A chuahkehnak a khua hi Taungphila ah a si i Malaysia ah hi FCC Khrihfabu ah a ummi a si. Pehtlaihnak number : Contact : 016 763 8667/ FRO Contact: 03 9226 1990/ 012 337 0091.