Laipa Biak Lian Thawng Yangon Airport Kan Phan I Ka Lau

Chin News

Myanmar Ram Kan Tlunnak Diary(Yangon Airport Kan Phan I Ka Lau). A caan cu cacawn nilini 05.12.2019 khuasik aa thokka hrawngah a si. Khuasik aa thokka a si kan ti ko nain kannih Norway ram ah cun a kik tuk cang. Leng chuah tikah kuthruk chahpi i hruk lo le hmawza chahpi i hruk in khuasik kedanbut a chung lummi i danh lo le angkileng lumpi i aih in lu a tuam dihmi lukhuh i khuh chih lo ahcun a kih tuk ah hin con dup in umnak phun khin a um. Kan chung thi a khal dih rua lai ti awkin cu tluk cun kan vun a ka țam i a kan kirh.

Image may contain: 1 person, selfie

Ramleng kal ding kan si caah a hlankan in suimilam pathum a duh ah vanlawng kawrawn phak a hau. Zingka sml 08:07 tlanglawng in kan kal i sml pakhat tluk kan kal hnuah Oslo airport kan phan. Suimilam 10:00 am a si in check in ah kan lut i kan thil kenmi pawl a cuai luan le luan lo an tah dih hnuah thilțhalo hna an phur sual maw phur sual lo ti hngalhnak caah kut dawhmi suitcase (Hand luggage suitcase) {Håndbagasje koffert} he minung he computer in an cheknak hmun ah kan lut țhan.

Image result for yangon airport"

Kan thil pawl an vun chek i hman duh caan ah chuah fawi seh tiin tlaitawn ah kan sanhmi hasii, tawh le a dangdang kan herh dingmi pawl kha computer nih a tlaih dih. An kan chuahpiak dih i an hlonh dih rua lai tiah kan zoh ko hna lio ah, ” Hi pawl hi cu computer nih a tlaih khawh lo dingin palastic a chah deuhmi in tuam ding si an ti i anmah nih an kan tuampiak dih hnuah computer in an chek țhan i cuticun kan lan țhan.

Hmailei ah kan hei kal țhan i atu cu mi lut chuak an cheknak hmun lahwahkah (Immigration) sinah kan phan. Passpost chektu pawl nih cun, “Zaangfahnak tein nan passpost nan kan pe kho hnga maw?” tiah mirh bu le hmaipanh bu tein an kan hal. Kan pek hna i kan i lawm (Takk) an kan ti. An chek dih hnuah an kan pek pah in, “Kan i lawm, nan khual lam tluang ko seh. (Tusen takk. La din vei være rett.),” tiah an kan ti țhan i cuticun nuam te le lunglawm thanuam tein vanawng chungah kan lut i kan vanlawngpi cu Thailand lei hoih cun a zuang thluahmah.

Chun he zaan he kan zuan hnu a thaizing 06.12.2019 zingka sml 07:00 hrawngah Bangkok airport ah kan țum. Bangkok airport chung check in ah kan lut țhan i rianțuantu pawl nungak tete cu an hmai a panh lo taktak, an hmai an i chiat i anmah Thailand holh in aw hranghrang in an kan chawnh, an kan hro salam ko. Khualtlawng le mi lut chuak chawnhkhenh ning an cawnpiak rua hna lo. Bangkok airport kan i dinh chungah kan hman i kan sanh țhanmi thilri cheukhat zihmui hei ti le hasii ti pawl kha an kan chuahpiak i an kan hlonhpiak dih.

Bangkok in sml 09:00 ah i thawh țhan i Yangon kha suimilam 10:25 am hrawngah a phan ding kan si nain Thailand kan phak bakin a caan a hmaan ti lo. Sml 09:00 ah vanlawng chung a lut ding kan si cang nain 10:00 hnu lawngah kan lut kho. Yangon airport hi zingka 10:25 ah a phan dingmi kha Bangkok in sml 10:15 am lawngin kan i thawh i chun suimilam 12:00 hrawng lawngah Yangon airport kan țum kho.

Ramkip in a ra ciomi kan si hna i minung kan tam i miphunkip kan i cawh hna. Yangon airport chungah kan hung lut cio hna i lahwahkah, immigration sinah kan phan. Ramleng chuak fa naule nih kawl holh an thiam lo, minung pakhat tete in ra u an kan ti tikah ngakchia kum nga, ruk lawng a si rihmi hna nih an nule sin kal loin anmah lawng taan le um an duh ti lo. Cucaah mi cheu fale nih an nule an zulh hna i kawl lahwahkah nu nih hehchat tiah kan hawile cu a hro colh hna. “Na fa chia ta, ratter hlah. Nangmah lawng ra, ramdang in kan ra nan ti zeihmanh nan hngal lo,” tiah a hmai ai chiat ai chiat i aw hranghrang in a hro ko hna.

Hawi nakin rianțha a tlai le rianțuan kho kan si tikah mi tangah aa dor i toidor nun tu a ngei ding kan si nain kan țuanmi kan rian, kan reng kha mi va hronak le midang namnehnak le zeirellonak tu i kan hman hi cu a poi kho taktak khi a si. Lahwahkah nih hman an kan thlak i ngakchia nih hnu pil deuh, hmai fong deuh, vancau deuh ti kha an i fiang ti lo. Cutikah nu le pa sinah holh a thiam lo hih nangmah nih țha tein chim ti um loin an thin tu a hung i an hro pah hna in hnu pil, hmai fong, van cau tiah an kut tu an zauh hna.

Thla hnih deng kan um hnuah kan ram lei kirnak ding ni le caan a hung phan țhan. Norway in air ticket kan rak cawk ah hin suitcase lianmi ah (20) kg a si i suitcase hme kut dawhmi ah (10) kg a si. Kan cawkmi ticket i a um ko caah kan rat lei zong țha tein an kan cohlan i Yangon tiang tluang tein kan phan kho. Sihmanhsehlaw kan kirlei Yangon airport kan phanh țhan cu khuaruahhar khi a si cang. Kan i ruah lo ning piin thil a kal cang. Kan i ruahning bantuk a si ti lo, kan ar rup ko hna. Check in ah kan hung lut i kan thil a cuai an vun thlai cu kan lo ko cang. Kan kirlei cu kan thil zong a tlawm deuh i (7 le 8) kg hrawng lawng a si cang.

Kan vanlawng ticket cawkmi catlap cungah kilogram cu zat phurh ngah tiah ai țial ko. Cucu a hmuh zong an hmuh ko i an hngalh ko nain (7 ) kg lawng nan phurh khawh, phurh a ngah lo an kan ti ko. Cuai a luan ruangah nan thil chia ta u an kan ti ko. Țha tein kan chimh hna, kan ticket catlap hi zoh u (10)kg phurh a ngah. Nain kan thil hi (8) kg lawng a si hi tiah kan chimh peng ko hna nain an duh bak lo. Cozah nih țuan man thlahlawh (Lahkhah) pek lomi le eidin cawknak a ngei lo i tangka a kawlmi ko an lo cang. Kan chimh len hna zongah an i theihter lo, an thluak an chuah i zeimalote zal sanh ding kha an ngen ko cang. Asinain kannih Norway ram ah cun zeimalote i pek, zik i nawh kha a um lo caah an duhmi le an ngenmi kan hngalh ko nain kan pe duh ve bak hna lo.

An thluak an chuah ruangah kan thluak chuah ve ko ne u sih luau kan ti i, a si kun ah cun thil hi kan chuah bang lai i kan chiah ta lai kan ti hna. Hmun dang ah kan kal i an thil cu bag khat in kan chuah hnuah an hmuh lonak hmun ah a dang tein kan chiah chung. Kan chuah i kan chiah ta dih cang, thlai țhan kun u law kan ti hna. An thlai țhan hnuah a ngah cang an ti i cuticun a chungah kan lut kho țhan. A chung kan luh khawh hnuah kan chuahmi thil vialte cu kan khumh țhan dih.

Cuticun 15.01.2020 zaan suimilam 07:45 hrawngin kan vanlawngpi cu Yangon airport in kan ram Norway lei panh in kan i thawh țhan. A thaizing 16.01.2020 deihlan suimilam 06:30 am hrawng ah Pathian dawtnak le umpi lamhruainak, kilvennak le zaangfahnak thawngin kan ram Norway Oslo airport cu dam te le tluang tein kan phan kho țhan.

Dinnak kha a cat lomi tiva batukin luanter camcin ko u (Amos 5:24).

Salai K. Biak Lian Thawng
Norway

Credit: Biak Lian Thawng (Global Rawn Chin Media)

Leave a Reply