Par Za Iang (Miss NZCC 2020) Nih A Laksawng CNF Caah A Pek. New Zealand ram, Wellington khua ah tuahmi Avoi 72nak Chin Miphun Ni & Kumthum Voikhat Tonnak ah Miss NZCC 2020 caah thim mi Par Za Iang nih a laksawng hmuh mi dihlak CNF caah a pek.

“Salai Thla Hei nih a tulio CNF an dirhmun a kan chimh mi nih ka thinlung a ka suk tuk hringhran. Kei vial New Zealand ramttha ah herhbaunak um lo tluk in siangin ka kai, ka duh mi course tthattha ka cawng kho. Cu lio ah ka miphun hawi, keimah tthirual tete a si mi CNF an fa le vial thingtang ramtang ah har ngai in khua an sa ti thawng ka theih tikah ka lung a faktuk. Mah ka laksawng tehi a zeitital in an caah a tthahnem ve ko lai tiah ka pek” tiah Miss NZCC 2020 Par Za Iang nih a ti.

Kum 17 lengno Par Za Iang hi New Zealand ram, Nelson khua ah a nu le pa he khua sa cuahmah lio mi a si. Nelson College for Girls ah Grade (tang) 12 a kai cuahmah lio a si. Chawlehthal (business) lei a uar ngai mi a si. Pathian nih lam hruai in a saduhthah tlinter seh law hmailei ah Ram le Miphun nih bochan mi nusalttha si ko seh.

Note: New Zealand Chin Community (NZCC) cu local Chin communities pathum: Auckland Chin Community, Wellington Chin Community le Chin Community of Nelson hna komh in 2008 ah rak ser a si. Credit: Seino Media Group