Pi Sung Sung Cancer (stage 2) zawtnak a ngeimi cu July 2019 ah pumpiak, chungkhar, khrihfabu le Community dangdang hna nih phaisa in siseh Lucky ticket cawknak in siseh kan rak bawmhmi kha a tu ah cun Pathian zaangfahnak thawngin le mipi thazaang chuahnak thawngin Operation voihnih (2) Chemotherapy voi 4, Radiotherapy voi 15 a tuah hnuah a dam cang tiah theih a si. Pathian thatnak thawngin le FRO i rianttuannak ruangah UN Card zong a ngah cang i sii lei he pehtlaiin i zohkhenhnak ding zongah Cozah siung ah 5o% discount a ngah tiah theih a si fawn.

Si ei ding rih a hau caah ei le ai a din einak zongah harsatnak um lo tein Pathian nih lam ahruai caah Pathian min kan thangthat. Sung Sung hi Hormone Receptor-Positive breast cancer asi caah kum 5 chung nifatin sii ei mi a si. Thlacamnak in siseh, phaisa in a bawmtu le Lucky ticet cawtu le bawmtu pumpak chungkhar le Community nan zate cungah lunglawmhnak bia kan chim. Hmailei caan zongah hibantukin midang bawmchantu si kho dingin Pathian nih thluachuahnak in pe ko hna seh!

Sung Sung nih lawmhnak bia tawite a chim vemi cu “Ka phu tawk lomi dawtnak in nan zate sinin ka co ruangah ka lawm tuk hringhran. Pathian ruangah le bawmtu nan zate raungah atu ah cun kan dam cang hi a si. Ka nunnak khamhtu nan zahte cungah lunglawmhnak biachim cawk lo ka ngei. Keimah nih kan chamh khawhmi le kan pek khawhmi hna zeihmanh a um lo i ka ngei lo asinain Pathian nih nan tuah ttuan kawlnak cio ah a thluachuah in pe hram ko hna seh tiah thlaza kan rak cam piak hna.

Thla 6 chung ka herhmi vialte a ka tawlrel piaktu, nifatin sizung ah a ka kalpi tu le ka ei din ding le ka hruk-ai ding tiangin a ka buaipi tu FRO cungah lunglawmhnak chim cawk lo ka ngei. Thlatin chaw le va in a ka bawmtu FCC, nifatin a ka zohkhentu le tuamhlawmtu U Ngune le ka umnak ka hawittha Adim tein chungkhar hna le hawi le kom dangdang cung zongah lnglawmhnak chim ka duh. Ka lunglawm tuk hringhran. Credit: FPM-FRO Malaysia