Laimi Nih Special Sunday Kan Uartuk Nak Ah Jesuh Nih Ni A Ngei Ti Lo- Rev. Hoi Cung Tum

Sermon

Laimi Nih Special Sunday Kan Uartuk Nak Ah Jesuh Nih Ni A Ngei Ti Lo- Rev. Hoi Cung Tum

Image result for hoi cung tum

Normal Sunday zarhkhat hmanh a um lo. Special Sunday deuh hlei zong zarhkhat hmanh a um hlei lo. Every Sunday Is Special a si. Zarhpi ni paohpaoh hi Bawipa Thawhtthan Ni a si caah a sunglawi zungzal, a nuam zungzal, a ttha zungzal i, a special zungzal.

Minung pakhat min lak in a luancia kum 50 hrawng ah tuah rak thawk mi kha Special Sunday kan ti. Cu ning cun tuak ve ti loin mipi nih kan hman. Mibu pakhat khuakhaannak in a luancia kum 100 leng ah rak tuah mi kha Special Sunday kan ti. Bawipa thawhtthan ni hi kan nawnnok i, kan duh paoh in kan hman dih. Kan theih lo cu zeitiawk dah a ttha fom, kan theih hnu tal ah kan i fian awk hrimhrim a si cang.

Kannih Laimi zong mirang nih an tuah mi paoh kha Bible ah a um le um lo zoh loin an tuah mi paoh kan tuah. An tuah mi paoh kan tuah ve caah nulenu i um le palepa i um zong hi hmailei ahcun kan cohlan te lai i, biakinn chung tiang zong kan tuah ve te ko lai dah. Human Right kan ti te lai. Democracy kan ti te lai. Nu nih pa ah i ser, pa nih nu ah i ser zong hi Pathian nih a dawt ko hna kan ti te lai. Si ee zumtu he zumlotu he a kan dawt dih ko. A dawtmi paoh in a fa kan si dih lo. A kan dawt dih. Asinain cu bantuk cu Pathian minung nih zeitik hmanh ah an tuah lai lo. Zei paoh tuah i, Bawipa a ttha ti hi Pathian minung nunning a si bal lo.

Cu bantuk cun kan pule kan pale mi hmasa pawl min kan bunh mi kha Special kan ti, a dang zarhpi ni sawhsawh cu a sawhsawh in kan i pum i, kan hman tinak a si cu. Kan caah an normal dih tinak a si lai cu. Mi hmasa pawl min bunh in kan tuah mi Special Sunday kan ti ahcun a dang Sunday pawl cu Normal Sunday kan tinak si ko. Pathian kan sarhsat le zei hmanh ah kan rel lonak kan langhter tu a si. Kan rak i theih lo caah a si.

Zei thil paoh hi an tuah ka ahcun a ttha in a thei mi tampi an um. Tuak len a si theng lo. A hmaan lo zong a thei mi tampi an um ko. An aupi ngam ve lo. Asinain caan saupi an hman hnu ahcun tthianh le thlen hi hohmanh nih ngamh a si tilo. Cucu a poi mi cu a si.

Bible a si lo ahcun i nautat awk a um lo. Ziah Bible hmanh ah na kir ngam lo ahcun Bible leng thil cu na dirpi? Hi vialte hi hlennak an si. Zei Special Sunday hlei hmanh a um lo. An kan hlennak an si. Zarhpi ni cu zumtu caah Jesuh nih thihnak a tei i, a thawh tthan ni a si caah Every Sunday Is Special a si. A special dih. Normal Sunday pakhat hmanh a um lo. Zarhpi ni paohpaoh hi Bawipa thawhtthan kan hman a si dih caah a special dih. Cucaah Bawipa Ni zarhpi ni fatin hi pumh kan i ngaih zungzal awk a si.

Tling deuh in ngaih duh mi caah vedio tawi kan rak thil chih.

 

Leave a Reply