Laimi Nih Pathian Thluachuahnak Kan Hmu Taktak Maw? Dr. Aung Myint Thang

Chin News

Laimi Nih Pathian Thluachuahnak Kan Hmu Taktak Maw?

Image result for Hakha thar

Laimi hi Pathian nih a kan dawt tuk, thluachuah a ka pek tuk ti hi Laimi awka in kan theih lengmang mi asi. Laimi hi Khrihfaah abuaktlakin (percentage) in kan tam mi zong hi Pathian thlachuah hmuh ngai ah kan i ruah. Cucaah Laimi hi Pathian thluachuah kan hmuh le hmuh lo, Pathian nih thluachuah a pekmi miphun kan si le silo vun zoh hna usih:

TAKSA THLUACHUAH ( MATERIAL BLESSING) KAN HMU MAW?

Laimi thlakrawh inn a ngei kho mi Laimi hi chungkhar 100 ah inn 3 lawng an si men lai. Atam deuh cu caphio vam, pharh vam, le thingrop inn ah khua kan sa. Mawtaw (motor) ai ngeih kho mi inchungkhar hi 100 ah 0.1 hrawng kan si hnga maw? Chungkhar 100 ah 80 nih thla khat ah kan inchungkhar ah a lut mi phaisa cu Ks. 200,000 (US$ 170) nak tlawm deuh a si. Kum khat ah Ks. 2,800,000 na thlawm deuh in khua kan sa hna. Anungkho deuh kan timi hna chungkhar khi ram dang ah fale felmi ai ngeih i a peem mi hna chungkhar an si deuh ngawt i, zuun i ngai lengmang buin khua a saa mi an si fawn.

Fale he hmunkhat ah nuamtein khua an sa tti kho hna lo i ingai lengmang buin a nungmi an tam. Chawleh i ai cawm kho mi hi 0.5% kan tling kho hnga maw titluk khi kan si hna. Khuate lei minung cu 90% nih thlanglo tuah i lothlawh rian kan ttuan hna. Khuuapi ah a um mi 80% cu rianttuanawk a hngal baklomi, ramdang ummi fale i vun bomhchanhmi kan si ngawt hna. Laitlang i a um mi khuate ahhin fur/tthal hlan in mawtaw fami, Jeep, a kal khawhnak khua hi 20% hrawng asi a zumh. 80% hrawng khuate ahcun cycle in harlengmangin duhherh vai zalh a si.

Kan retheihning ah: Ramdang peem mi hi abuaktlakin dinlo bakin nikhat ah nazi 10 in nazi 12 chung Monday to Saturday rianhrang ttuanmi kan si, Lai lei khuate ummi hi thingphurh le lothlawh bakin cawm khawh ai zuam mi kan si. Khah! Laimi hi taksa thluachuah kan hmu kan i ti kho hnga maw?

(B) THLARAULEI THUACHUAH (SPIRITUAL BLESSING) TAH KAN HMU MAW?

Apiangtharmi le Bawipa ah ai lawm mi i 15% hrawng cu Bawipa i an i lomhnak hi Pathian ca i ttuannak le hmuhkhawhmi dawtnak ah (love in action) ah langhter loin laam le kui le rock bak in a langhter i biakin phiah hmanh ah ai pe kho ttung lomi kan si. Yangon area lawngah ngakttah le bomhchanh a herh mi hngakchia cawmnak le zohkhenhnak hi 500 hrawng a um. Hngakchia a um mi hna hi 20,000 hrawng tal cu an si lai. Laimi Khrihfa nih kan bomhmihna hngakchia hi 50 an tling lo men lai.

Theihballomi ramdangmi nih an bomhmi lawngte an si. Yangon lawng ah Laimi nih kan tuah mi Bible siangin hi 100 reng lo a um i, siahngakchia hi 2000 in 3000 kar hi Pathian bia a cawng mi an si. Hi hna hi Ramdangmi nih an kainak Baibal siangin kha an bomhnak thawng in ca an cawng kho hna. Kan Laimi Khrihfa nih kan bomh mi Baibal siahngakchia hi 50 an um men lai lo.

Kan Laitlang ah atambikmi cu crusade le campaign tuah asi. Khua pakhat ahcun crusade hi kumkhat ah voi 15 bak an tuah ti a si. Crusade tuah caan poh i hrintthar, thlakhat hrawng a rauh in tluk tthan lengmang timi nun in a nung mi hi atam deuh cu kan si. Cun, Laimi hrintthanak a hmu bakmi hi 10% kan tling hnga maw? Atamdeuh cu Hell ah duhsahtein a kal ciahmah mi an si.

Evangelist kan i ngeihmi hna pawl hi thawngthachima thiam taktak mi an tam. Zumhnak thlaici tampi a cohlang mi zong an tam. Asinain, an hmuh mi phaisa chungin rammui rianttuannak ah a pe chin mi, evangelist hi an har ngaingai. Zumhnak thlaici cu an pek hna nain, anmah nih zumhnak thlaici pek ve a hmanglomi kan tam.

Communist ram le adang muslim ram hna ahcun Khrih ruangah hremnak a tongmi an tam ngai. A nunnak a liam mi zong an tam ngai. Laimi belte Khrih caah a temtuarmi kan um lo khan a si rih. Laimi nih ramdang hna i hawi ramdang Pathian mihna bantuk i mission hna va tuah ding he khin cun kan i hlaat tuk rih.

Khah hi vialte hi zoh usih law, Laimi hi Pathian thluachuah kan hmu kan i ti hnga maw? Asiloah, kan hmu lo kan hmuh chinchin nakhnga kan i zuam chinchin a hau kan ti hnga dah?

Credit: Dr. Aung Myint Thang

Leave a Reply