Laimi Nih Pathian Le Miphun Nak In Biapi Ah Kan Ruah Mi Pathum

Chin News

Laimi Nih Pathian le Miphun Nakin Kan Biapitter Deuhmi Pathum

Image result for hakha

Laimi nih biaknak ah fellowship silole kohhran in Pathian zumhnak le biaknak hrambunh a si. Cun, miphun ah community (organization) silole tthanchonak phu tbk in hawikomhnak le funtomnak tuah a si. Laimi tampi buutnak le funtomnak kan zoh tikah, buaibainak le tthenttheknak tampi a chuak. Hi kong pehtlai ah a ruang phunphun le tampi an um lai, sihmanhsehlaw pumpak hmunhtonmi pehtlai in muru bik an si ko tiah ruahmi pathum ka langhter lai.

1) Hruaitu dirhmun – kan buaibainak le tthenttheknak pehtlai in pakhatnak bik a ruang cu ‘hruaitu dirhmun’ ngei in hruaitu duhnak hi a si. Zapi buutnak ah hruaitu dirhmun duh in a ummi minung hi an tam theng lai lo, nain an i-zuam ve i, a donghnak ahcun ttanhtu le dirpitu an ngei kho ve. Zapi buutnak ah hruaitu dirhmun a duh tukmi le ai cuh pengmi cu ‘theih le hngalh khawh’ an si ko. An hmurka cun ai thup men lai. nain ‘an tuahsernak nih a langhter peng lai’. Cu bantuk hruaitu dirhmun duhnak ngeimi minung hi ‘kohhran, fellowship le community’ tbk ah an um cio – a donghnak an chuahter khawhmi cu thlennak le tthanchonak silole buainak le tthennak hi an si. Nai telnak le umnak buu le phu chungah, hruaitu dirhmun a duh tukmi na van hngal colh kho hna maw?

Image result for hruaitu

2) Khua – laihri tannak le chuahnak khua cu tlaihchan cio a si. Cun, khuami hna zong harnak le retheihnak zawn ah bawmhchanh le zohkhenh khawh a ttha i, khuami caah tthanchonak zong tampi tuah khawh cu a ttha. Sihmanhsehlaw, khuami sinak cherhchan in rianttuannak le hruainak ah dirpi ding si lo (politics bang nan ruahnak ai khah dah ti locun). Laimi lakah poi ngaimi bal cu ‘khuami’ in hmunkhat ah ttantti le dirtti tam ngai (rianttuannak le hruainak ah). Khuami van ti cun, miphun le Pathian cu kan philh colh. Khuami sinak cherhchan in hruaitu thim si, khuami sinak zohchih in kohhran (fellowship) dirh si i, khuami sinak hmang in community zong dirh a si.

Image result for fellowship

3) Pengtlang – miphun silole Pathian rianttuannak ah thathu ngaimi zong pengtlang rianttuannak, funtomnak le tthanchonak tbk ahcun felfai le teima bikmi an si tawn. Hruaitu thimnak ah siseh, minung dirkamhnak ah siseh, tthancho tuahnak ah siseh, kohhran dirhnak ah siseh – pengtlang hoih in tuahmi a tam. Miphun caah a khiar ngaimi zong pengtlang caah kan siang. Kanmah lei deuh minung hruainak, rianttuannak, cawlcanghnak le phu tbk ah ai tel vemi an um locun, thapek cu chim lo – kanmah i-tel ve duhnak lungthin a tlau. Cun, cawnpiaktu sawmnak, hlasatu sawmnak, bawmhnak tuahnak le tthanchonak tuahnak tbk caah, mah khua le pengtlang cio dirpi si tawn (hihi meeting ah a lang ngai tawn). Pumpak cio nih na ttanhning hoih cu nai hngalh ko lai? Pengtlang van ti cang cun, miphun le Pathian cu khoika um hmanh kan hngal kho ti lo.

Kan miphun chungah buaibainak le tthenttheknak a umter in, miphun huap in tthanchonak le funtomnak a kan ngeihter kho lotu hna hi, a cunglei langhtermi pathum hi an si. Biaknak ah siseh, miphun ah siseh – khua in kan i-tthen, pengtlang in kan i-then (capo van talh pah cun, Lai Paih hmanh ah khua le pengtlang in kan i-tthen eh). Langhtermi thil sining nih, a poi tukmi thil a fiantermi cu ‘a ttha le chia, a dik le palh’ timi kan tthen kho ti lo. Kum zabu 21 chungah kan miphun nih kan doh khawh lo si cun, pengtlang cio in miphun pakhat cio ah kan um lai i, pengtlang miphun fonhchom Laimi’ tiah kan si te lai.

Ref: Van Nun

Leave a Reply