Zumtu hawile hna: Christmas kan sunhlawih ning ka zoh ah kan luan cang in ka hmu, Christmas a sunhsak bik pawl ka sii buin. Tuanbia i a langh ning ah cun Zisuh chuah hlan in Tangkhawng Kuut “winter solstice festival” ti mi German lei khuacaan kuut a um cang i, mah he ikiap cun Christmas aa tuah hi a si ti a si. Krifami nih cun Zisuh chuah lawmh in kan tuah. Sullam dawhte kan ngeihter.

Asinain tuchan i Christmas kan sunhlawi ning hi cu a luan cang rua ka ti. Chuah ni cu ni khat te a si ko bu ah a thla pumpaluk in chuah lawmh nak ah kan hman. December thla a chuah sin in biakin cheukhat ah cun Christmas hla lawngte sak, a chuah nak kong lawngte chim a si. Kan ilap tuk, kan hlawp a tlo tuk, kan ttang tuk. Micheu hawihna nih cun “Sweet December” hmanh an don “Kawlram Karen miphun nunphung a si mi rumro”. Khua le peng cio ihlam nak ca i Christmas kan tuah zong a tam. Mahti tai tai i lawmh hau cu maw a sii ko zei dek! Sullam kan ngei tuk lo. Mah ca’h cun December thla chung hi pumh ka duh set ti lo, kei cu.

Pathian nih Zisuh chuah lawmh a kan fial lo. Zisuh zong nih a kan fial lo. Paul zong nih. Kanmah ruahnak le lungtho in kan lawmh mi a si. Naga miphun i vapual puai an tuahpiak bantuk a si. Zisuh chuah lawmh kan tuah ah Pathian aa lawm maw ti kan hngal lo. Zisuh hrimhrim aa lawmh le lawmh lo zong kan hngal lo, Thiang Thlarau aa lawm maw ti zong. Tuah cu a ttha ko. nain mahti taitai i tuah hi cu a duh lai tiah ka zuum lo “zumh zong aa zumh lai lo. Kanmah nuamh nak ca deuh si dawh a si ko.

Krifa hmasa nih si seh, kanmah he zumhning aa dang mi krifa bu dang nih si seh, Christmas an tuah lo. Annih hmuh ning ah cun, Christmas va tuah tehna hi hlanlio mirang nunphung icawn thilti ceo a si. Mahhna cu kannih nih kalsual ah kan ruah/chiah tawn hna. Ataktak ah cun, kanmah tu hi kalsual deuh dawh kan si, puai tuah kong ah cun. Birthday celebration cu ni khat tuah ah a za. Kawlram i kei ka um nak ah cun ni khat leng Christmas tuah a si lo.

December 25 ni khat te lawng hi Christmas ah ruah a si i mah ni lawng ah cun Christmas tuah a si. Mah nih cun Christmas a sunlawiter. Sullam zong a ngeihter. Atu cu November a dih bak in Christmas bia le hla he iciah colh le aphuphu in Christmas tuah cio a si i, vuai hnu le simh hnu cikcek ah Christmas cu phanh a si. A rua dih cang. A sunglawi ti lo. Krifabu nih sullam set ngei lo i thil a ti lengmang ah cun kan krifa sinak hi a vuanlau kho. Bu hruaitu nih sullam ngei deuh in an kan hruai a hau. Credit: Albert Hlun