Laimi Mit Ah Nu Pastor: Tuchan khrifabu cheukhat ah Nu nih mipi cawnpiaknak le zei dangdang ah kham an si lo hmanh ah Pastor si dingah cun aduh lotu le a khamtu tampi um rih asi. Baptist le AG tbk ahhin cun Nu pastor hmuhding an um ngaingai, nain buu dang tuah cun an um lo tluk khi asi ko. Cuti Nu pawl pastor caah kan kham hna nak ah micheu nih kan hmanrua ah kan i tleih bikmi Bible cacaang cu, Lamkaltu Paul nih Timothy sin ah cakuat a ttialmi kha cherhchan ah hman bikmi in a lang.

Cu he pehpar in Pathian rianttuan-tu ka halchuan tawnmi hna lak zongah, atam deuh nih cun Nu nih pastor ttuan an lung arak tling lonak hmuh asi tawn. Ziah ticun Paul hrimhrim nih pei (I Timothy 2:11-15) nak ah nu nih mipi cawnpiak ding arak khamnak kan hmuh khawh cu. Hika cacaang ningin kan zoh tik ah Paul nih Nu hna nih mipi cawnpiak lo ding hrim in akan cah ta i, Nu cu cawnnak hmun chung zongah dai tein tthu ziar ko hna seh law, mipi cawnpiaktu ah i tel hrim hna hlah seh tiah akan ti. Cucu Paul nih hin Nu hi arak kham duh taktak mi asi maw or zeidah akan cawnpiak duh taktak mi asi? timi tuten ah tlawmpal tein kan van zoh tti hna lai.

Kan Bible Biakamthar kan zoh tthan tik ah Pa btk in Nu pawl zeitluk indah Pathian ram caah an rak i hman i, Thiangthlarau laksawng an tinco ve timi tampi hmuh khawh asi. Cu an tinco mi laksawng cu Khrih ram caah santleihnak tampi arak nei (1 Cor 12:7-26), cu an rianttuannak hmangin Khrihfabu tthanchonak caah bomtu taktak arak sinak zong akan hmuhsah. (Lamkaltu 18:1-2, 18-22) kan van zoh tthan tik ah amah Paul hrimhrim kha Nu he rian an rak ttuan ttinak kan hmuh i, cu Nu min cu Priscilla “Equila nupi” asi.

Priscilla cu Khrihfabu chungah a colcaang ngaingai mi nu pakhat asi. Cun (Lamkaltu 16:11-15) zongah Paul cu Lydia inn ah ai tthumhnak kan hmuh khawh tthan, Euodia le Syntyche hna zongnih an bomhnak kan hmuh khawh tthan, cucaah Paul nihhin Timothy sin ca arak kuatmi hi Nu hna kham duhnak, thleidannak le zeirel lonak menmen ah arak ttialmi si loin, thildang kha arak chim duhmi aum ti alang, cucu tlawmpal in kan van dawi tthan rih tuah lai.Pakhat aum mi cu Paul nihhin Nu hna hi Pa nak in rak thleidang hna seh law cu, Nu he rian arak ttuan hrimhrim hnga lo.

Afiang mi pakhat cu Paul nih cawnpiaknak hman lo pawl kha ralrin arak peknak hnatu arak si (1:3-11, 18-20, 4:1-10 ect).Paul cakuat nih a kalpi-mi kan zoh tikah hmuitinh-mi pakhat aum i, cucu khrihfa community chungah“heretics-cawnpiaknak palh” a dohkalhnak kha asi ko.“Thomas R. Schreirner ttialmi Women in the Church” ahcun Paul nih hi cakuat arak ttial lio ahhin cawnpiaknak palh nih Nu pawl cungah influence arak tuah ngai hna caah asi ati, cucaah Paul nih cawnpiaknak hman lo nih anenh cangmi Nu hna nih mipi cawnpiak ding kha arak kham duhnak pakhat asi e ati (I Tim 5:11-15, II Tim 3:6-7).

I Timothy 5:13 nak ah fiang tein kan hmuhmi cu Nu nih micawng-awih duh ah inn-khat hnu inn-khat ah an i tthial e ati. Cucaah Paul nihhin hi btk Nu hna kha fak piin arak kham duhmi tu kha asi deuh. Verse 9 nak kan zoh tikah Nu hna nih zohdawh tein i hruk-eih hna seh law, leenglei dawhnak kha biapi ah chia loin chunglei nun dawhnak tukha biapi ah chia hna seh tikha Paul nih a kalpi mi cu asi ko, cucaah Paul nih Nu zohchuknak kha chim duhmi si loin, Khrifa nunzia kha kilhkamh arak duhnak tu asi deuh. V 9-10 nak kan zoh tthan tik ah Nu timi ah khan plural ahman i, 11-12 tuah khan cun singular ahman tthan.

V 11-12 nak ah Paul nih Nu cu cawnnak chungah dai tein um hna seh”tiah ati tik ah, Paul nihhin Nu nih cawnnak an neih ding kha aduh piak hna i, thazaang apek hna tinak asi. Acung ah kan chim cang bangin Thomas R. cauk ningin cun Nu hna nih cawnnak an neih hnu ah mipi cawnpiak ding kha Paul nih arak kalpi mi lam asi ati. Paul hmuitinh taktak cu Nu hna kham si loin, fimnak ah a chanbau mi Nu hna le cawnpiaknak palh nih a nenh cangmi Nu hna kha arak kham hnanak asi.

Ziah ticun Judaism phunglam kan zoh tthan tik ah Nu hna nih cawnnak an neih ding kha rak kham an si. Azei sihmanh ah tuchan kan zatlang nunnak ah le Khrihfabu ah, Nu nih pastor ttuan awk an si lo tiah direct in hi cacaang hmangin interpretation tuah awk attha hrimhrim hnga lo.

Kan i tleihmi Bible cacaang, acung le atang ah zeitin dah? achim timi zohchih peng aherh tawn, cu loah cun Jesuh nih (tthat lonak an tuahter tu na kut kha ten law hlonh ko “Matt 5:27-30”),tiah ati mihna kha direct in interpretation kan i tuah asi cun, kut le mit loin, Khrih zumtu vial te khuasa dingin kan um ko hnga. Chim duhmi cu Bible hnu hmai zoh loin chim hi, acaan ah fak piin i palh khawh asi tikha asi. Credit: J. Khua Uk