Yangon ah Laimi le Laimi an i Report caah Pumh Lio ah Minung 3 an Tlaih Hna. Yangon ramtthen, Shwe Pyi Tha peng ah Laimi le Laimi an i report ruang ah pumh lio ah ralkap/palik nih an kal hnawh hna i pastor nupi telh in minung 3 an tlaih hna, tiah thawngpang kan theih.

Nihin August 9, zinglei sml. 10:00 hrawng ah khan Shwe Pyi Tha khua, Bayitnaung lam pawng ah a ummi Cornerstone Baptist Church (CBC) ah ralkap/palik minung 7 nih an kal hnawh hna i Rev. Uk Ling Thang a nupi Pi Zing Zing le khrihfa upa minung 2 an tlaih hna i palik sakhaan ah an kalpi hna, tiah Khrihfabu ttuanvo ngeitu upa pakhat nih The Chin Journal ah a chim.

Kanmah Laimi thotho a simi Pathian rianttuan Saya Mang timi pa nih sang uknak zung ah a report hna i an tlaih hna, tiah a cunglei upa nih a chim. Kan Laimi a simi North Dagon lei ah biaknak lei in Doctor le Reverence a hmu vemi Saya Mang timi pa nih a report hna. A report hnanak ca ngaingai cu sang uktu zung nih a kan hmuhter lo.

Asinain, ‘Ramdang lei in a rak tlungmi minung pakhat nih CBC biakinn ah tangka a phawt hna lai tiah report a um’ tiin sang uknak lei zung nih a kan chimh,” tiah a chim.Nihin zinglei ah CBC biakinn ah hla cawn le lam cawn ding in saya pakhat an sawmmi cu a um. Asinain, ramdang lei in tangka an phawt hna lai timi cu ahmaanlo tuk, tiah a chim chap.

Biaknak lei rianttuannak ah pakhat le pakhat hnachuahnak a um ruang ah an i report hi a si kho men,” tiah Shwe Pyi Tha Laimi upa pakhat nih a ruahnak le a hmuhning a langhter.Tlaih a tong vemi Rev. Uk Ling Thang a nupi Zing Zing hi July thla ah nau a ngeimi a si. Nausem ngei a si tik ah Rev. Uk Ling Thang zong a lungrethei ngaingai.

Rev. Uk Ling Thang belte hi US ah Baibal sianginn kai in a um lio a si. Thlacamnak in kan bawm cio uh tiah Laimi sin ah bawmhalnak zong a tuah. Tlaih a tongmi hna himbawm tein an luat tthan khawh nakhnga an tawlrel cuahmah lio a si. Pehzul in thawngthanh kan i zuam tthan lai. Credit: The Chin Journal.