Lainu Malaysia a rak tlungmi nu pakhat Kum 30 hrawng simi Lainu cu tuzing suimilam 10 hrawngah Yangon airport ah a phan i atulio zawtnak tihnung Coronavirus angei tiah an lunghrinh caah Yangon sizungah a rannak in checknak tuah dingin an kuat colh tiah kan theih.

Lainu an lunghrinhmi nu hi tuzing ah Malaysia Kuala Lumpur in kawlram leiah rak tlungmi a si i Yangon Airport a phak bakin nawlngeitu nih a ngandamnak an check tikah a tak alin, a khuh i a thaba zangba in a um caah coronavirus zawtnak bantuk a si ko tiah an lunghrinh hi tuanvo ngeitu hna nih sizung leiah an kuat colh.

Lainu Coronavirus a ngei tiah an lunghrinhmi min an langhter duh lomi cu kum 30 hrawng minung asi i atu hi zohfelnak an ngeih lio a si i an zohfel hnuah sibawite nih National Institutes of Health Laboratory tim ah kan kuat lai tiah theih a si.

Biakilh: Kan i ralrin taktak aherh cang tinak a si. Zawtnak cu hrial len duh zongah hrial khawhmi a si lo caah i ralrin taktak aherhmi a si. Sibawite nih tuah uh an timi, cucu tuah law a ttha an timi kha tuah khawh i zuam hna u sih law i ralring hna u sih. Thawngpang thar a um ahcun thanhtthan khawh kan i zuam tthan lai. Hmanthlak a remcaanning in kan tarmi a si. Chinword

Tuchun thawngpang: Atu lio zawtnak ṭihnungvawleipi nih abuaipimi Covid-19 (Coronavirus) zawtnak a ngei tiah lunghrinhmi Mandalay ah thlopbul cuahmahmi kum 68 tarnu pakhat cu cacawn nihnihni March 5, 2020 ah Mandalay sizungah a thi tiah Mandalay Sizung i sibawi rianṭuanmi Dr. Khin Yaw nih a chim. ” A thimi hi Covid-19 (Coronavirus) a ngei tiah lunghrinmi a si i amah hrimhrim a ngandamnak ṭha lomi a si i a kal lei zawtnak, lunglei zawtnak thi kainak zawtnak tibantuk a ngeimi a si i amah hi mithau a si” Mandalay sizung lutlai Dr. Khin Kyaw nih a chim chap.

A thimi nu hi Mandalay khua Maha-Aungmay peng ah a ummi a si i atulio zawtnak Covid-19 he ai lo tiin an lunghrinh caah sizungah a thlopbul dingin a piahmi a si. A thimi nu nih hin Covid-19 (Coronavirus)a ngeih le ngeih lo zohfel dingin ah kuat a si cang i cu hnuah a fiangte lai. Credit: 7daynews

Biakilh: Kawlram le Tuluk ram hi aneihtukmi a si caah kawlram mipi kan i ralrin taktak aherh. A phan lai lo ti chim khawh hrimhrim a si lo. Hi zawtnak hi i chawnh fawite mi zawtnak ṭihnung a si caah kan i ralrin ngaingai ahau cang. Vawlei cung ramkip ah a phan cang i vawleipi lungrethei in a um. A karh rantuk caah kan daithlan sual ah cun a poi ngaingai ding a si. A damnak sii le hmuh a si rih fawn lo. Cucaah i ralring hna u sih!