LAIMI HI RAMMUI (MIHRUT) KAN SI RIH NAK A LANGHTERTU: Laimi kan rak hrut tuk rih, chan nih a kan kal taakmi kan si rih, chan kan dawi kho lo tuk rih ti a langhtertu hna cu: (Asua deuh caah pakhat lawng ka ttial rih lai)

1. THISEN CHECK TA LO IN KAN I TTHITUMHMI

Laimi nih tthit ding le vaat ding ah kan hrial deuhmi hna le ram fim mi hna nih an hrialmi hi ai dang ngaingai. Laimi nihcun misifaak nan kan hrial, catang ngeilomi nan kan hrial, mi muichia nan kan hrial, ram sifaak ummi hna kha nan kan hrial. Tthit ding le vaat ding ah nan vision ah nan chiahmi hna cu, catang ngeimi, mirum mi, mi purua ttha le ramthumnak i a ummi hna kha an si.

Ram tthangcho i a ummi hna nih an hrial bikmi hna cu AIDS, B-Rungrul le C-Rungrul ngeimi hna kha an si ve. Laimi zongnih kan hrial ve ko ttung hna nan ti lai. Asinain kan ram ah ai tthi-um mi hi vialte ahhin thisen check ta hnu ah ai tthi ummi hi pazeizat dah nan si cang? Thisen check ta loin ai tthi-um mi lawngte nan si ngawt ko lo maw? Nupi nan hal ah thisen check kong cu a chim in nan chim ngam lo a si lo maw? Cucaah mirum nan vaatmi pa kha AIDS ngei selaw zeitindah na tuah lai? USA in na van halmi nungak kha AIDS he C-rungrul he ngei selaw zeitindah na tuah lai? Hi hmanh ruat ta lo in tthitumhnak a tuah pengmi nih zeitindah sex in cawnh khawhmi zawtnak hi kan hrail ve ko tiah nan ti khawh? Nan ka lawngin maw nan hrial?

Ramthumnak i a ummi nih an in hal hna lebang ahcun thisen check kong cu a chim in nan chim ngam ti lo asi lo maw? Kan puai a piat sual lai ti nan phang asi lo maw? Asi loah ramthumnak ka phanh khawh poh ahcun hi zawtnak rungrul pawl hi ka ngeih ko zongah a poi lo nan ti duh nak maw a si ne?

Thitumh hlan i thisen check kong chimrel cu ngamh lo dingmi thil zong khi a si ti lo. Thuh awk a tthami thil zong khi a si ti lo. Asia ah AIDS a tam bik nak hi percentage (abuaktlak) Thailand le Cambobia an si. cun Kawlram a si. Cupinah Laimi hi vawlei cung pumpi kan cul dih ve cang. Acheu Phakanh, Manshu in an rak tlung, acheu Malaysia in an rak tlung, acheu AIDS a tam taktak nak Thailand in an rak tlung, acheu AIDS a tam taktak nak India, Mizoram in an rak tlung, acheu AIDS a tam taktak nak USA in an rak tlung. Lai Tlang ah nungak an helh, tlangval an kom, condom an hmang hna lo. Lai Tlang ah AIDS, B-rungrul, C-rungrul hi kan ruah ning nakin a let in a tam deuh cang. Cu lio ah nannih nih ai dawhmi poh lung thiang emem in nan hal hna le a medical condition pakhat hmanh thei lo in nan he tthit hna. Ttih a nung taktak si!

Angaingai ti ahcun tthitumhnak caah biakhiak tu cu thisen check mi nih result a peekmi tu kha a si awk a si deuh cang. Thisen check ta lo in tthitumhnak kan tuah peng hna rih asi ahcun Laimi hi ABC nih zatceu cu a kan hloh khawhmi a si. Cucaah thisen check ta lo in Laimi nih tthitumhnak nan tuah peng rih mi nihhin Laimi hi rammui mi kan si nak le vawlei chan tiluan kan dawi khawh lo nak kha a langh ter. Laimi nih ttih ding le ttih lo ding hmanh kan hnga lo tinak a si. Laimi rammui mi kan sinak alanghtertu thil tampi lakah pakhat a si.

(Kachin kan hawi pakhat nih kan chungkhar nu a rak kan hal bal. An thisen ka check ter hmasa hna. Cu pa cu AIDS he C-rungrul he positive bak a si. Zohnak sawhsawh ahcun cu pa cu a dam tuk. laimi mi tampi nihcun an vaat top hnga). Laimi nih nan i tthit-vaat sualmi zonghi an tawr cang lai dah!

Credit: Aung Myint Thang