Laimi (Chinmi) Khrihfa Lakah Amazon Tupi Chung Tlawngmi Bantuk Minung Kan Tamtuk Rih

Chin News

Saya Van Tum: Laimi (Chinmi) kan Khrihfa nun: Kan chim voihra bang, Laimi (Chinmi) Khrihfa kan sinak cu kum 110 leng nawn a si cang nan nitin kan Khrihfa nun zohtik ah biaknak nei lomi, a tthangcho lo tukmi, Amazon tupi chung i a ummi, miphun a lomi kan tamtuk rih. Kan Khrihfa cawnpiaknak cu kan nunnak ah hmuh ding a um lo tluk a si.

Image may contain: 1 person, standing

Crusade le campaign cu atu le atu kan tuah lengmang nan kan i cawnpiakmi vialte cu kan i nunpi kho fawn lo. Miphun fate a si ko ttung i pastor, evangelist le gospel singer zong a nei tambik kan si men lai ka ti. Crusade le campaign, le cawnpiaknak dangdang zong kan tuah a tam hringhran ko nan miphun dang Khrihfa nun le kan Khrihfa nun zohchunh tikah kan rak chambau tuk rih. Curuang ahcun kan i cawnpiak ning zonghi kan thleng deuh le kan remh deuh cu a hau lai tiah ka ruah.

Buddhist ram, Kawlram ah a ummi, Chin state cu 100 ah 85 zatuak cu Khrihfa kan si lai kan ti. Asinain, Bible nih a kan cawnpiakmi, dinnak, thleidan lonak, eihmuar lo ding, zik i nawh lo ding, zer tiang in fir lo ding, le i ruannak vialte cu Chin state chungah a tlawmbik a si/a um lobik a si, Kawlram chungah. Kawl Buddhist sinah missionary cu bukip in thlah cio a si. Asinain, Chin state cu Kawlram chungah din lonak, eihmuarnak le ziknawhnak a tambik nak a si tikah zeitin dah Buddhist pawl nih cun Pathian thawngttha kan chimmi cu an kan zumh khawh lai/an cohlang khawh lai? Zeitin dah Buddhist ram ahcun Pathian tehte ttha cu kan si khawh lai? Zeitin dah Bawi Zisuh zultu ah Buddhist pawl cu kan ser khawh hna lai?

Kum tamtuk, Buddhist pawl sinah mission rian zong kan ttuan lengmang ko nan Khrihfa ah kan canter khawhmi hna cu an tlawmtuk rih/chim tlak lo a si rih ko. Cu ruangah a hmasa bik ah Chin state cu Kawlram chungah dinnak a tuah bik state ah kan ser ta a hau. Chin state cu eihmuarnak le ziknawhnak a tlawmbik nak state ah kan ser a hau. Cuhnu lawngah, Buddhist ram a simi, Kawlram ah Pathian tehte ttha zong kan si kho lai i mission rian kan ttuanmi zong mah hlan nak in a tthangcho deuh lai/a sawt deuh lai.

Khrih zultu ttha tampi kan chuahpi khawh lai. Kawlram Buddhist pawl sinah Pathian tehte ttha kan si khawhnak dingah le Khrihfa ah kan ser khawhnak hna ding ahcun Chin state i din lonak, eihmuarnak, ziknawhnak, thleidannak le zatlang nun i sualnak vialte cu kan hrawh ta dih a hau lai. Cuhnu lawngah an sin i Pathian khamhnak thawngttha kan chimmi zong an zumh khawh deuh lai/an cohlang khawh deuh lai.

Chin state cu Kawlram chungah din lonak, eihmuarnak, ziknawhnak, i ruan lonak, le thleidannak a tambik a si ruangah a phichuak cu Kawlram chungah thlarau lei he taksa lei he a sifak bik le a tthangcho lobik kan siko. Kum 110 leng Khrihfa kan si cang nan Buddhist ram ah Pathian tehte ttha kan si kho rih lo. Nifatin kan nunnak zongah Khrihfa nun le ziaza hmuhding a um lo tluk a si/a tlawmtuk rih. Ram tthangchonak ram ah a phanmi Laimi tampi zong, Laitlang ah a ummi kan chungkhar pawl nih a piangthar dih hmuh in an kan hmuh nan atutan US thimnak zulh in zohtik ah kan Khrihfa sinak le nun ziaza cu a lang dih ko. Kan piangthar (hrintthan ning) ning cu cenghngia tuuphaw aihmi ko kan lo dih hna.

Atutan thimnak ah kan mizia taktak cu a lang dih ko. Ramrum le ram tthangcho, kan phak hnu i a piangthar ngai bantuk i kan rak ummi hna hi kan nuncan a tthat deuh, a tlamtling deuh, a sinpit deuh le a nuamh deuh ruangah a rak si ko rua hi. Thinlung le thlarau tak in a piangthar mi kan rak si rua hna lo. Khrihfa sinak a sau tuk cangmi, campaign le crusade le cawnpiaknak a phun2 a tuah tamtuk ttung i Khrihfa biaknak le cawnpiaknak, Khrihfa nun, Jesuh nun le cawnpiaknak le thil tuahmi vialte cu nitin kan nunnak ah hmuhding a tlawmtuk rihmi cu ningzak le ngaihchia ngaingai a si ko.
Mah Bible caang pathum hi nichiar te rel in tuah i i nunpi cio dingah kan sawm hna.
1.”Asinain Thiang Thlarau nan cung i a tlun tikah cun, thawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai. tiah a ti hna” (Lamkaltu 1:8).

2. “Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai, tiah a ti hna” (Matthai 28:19-20).

3.”Nannih cu vawlei cite nan si…Nannih cu vawlei ceunak nan si. Tlang cungah an tlakmi khua cu zeihmanh nih a phen kho lo. Ahohmanh nih meifar an van tikah kho an khuh bal lo, mei vannak tu ah khan an chiah tawn i inn chung i a ummi vialte kha a ceuh dih hna. Cu bantukin nannih nan ceunak zong cu mi hmaiah a ceu awk a si, cuticun thil ttha nan tuahmi kha an hmuh lai i vancung khua i a ummi nan Pa kha an thangtthat lai” (Matthai 5:13-16).

Leave a Reply