Lai Media Nak In Ca Reltu Mipi Nan Zual Deuh Tuk

Chin News

Lai Media Nak In Ca Reltu Mipi Nan Zual Deuh Tuk

Image result for Media

Hi kong hi chim zong ka tim lem lo nain Lai Media cu ee kha ee timi a tamtuk cang tikah kei zong online cattial mi ka si ve tikah ka hmuh ning le ruah ning chim ve ka duh.

A ngaingai te ti ko ahcun Media nak hmanh in mipi pawl hi nan rak chiarhu deuh taktak timi a lang cang, minung cu a hohmanh kan i lawh cio lo bantukin online media zong hi kan i lo cio hna lo. A cheu nih mipi caah tthat hnemnak le Pathian bia in an si khawh chung an i zuam i an thlah, a cheu nih cun nan rel ve ko nain tam u nih cun mah bantuk ca ttha le mipi nih theih herhmi pawl cu nan rel duh lo.

Nan rel duh mi cu horduh cuainak, sex kong le a luklak deuh lawng nan rel duh i, nan rel dih hnu ah ca thlahtu pa kha heh tiah mipi nih nan phomh tthan i si ko cu. Cu tikah ca ttialtu pa nih nan lungput le sining a theih dih hnu ahcun a rak ttial peng nak si ko. Thil ttha lo cu zeitluk an chim le an post zongah nangmah ca reltu pa nih rel lo i dai tein na um ko ahcun an tuah bal lailo hme cu.

Cu ruangah a zei paoh ah media hi kan thangchiat tuk hna ding a si thlu lo dakaw. Nanmah nih a hna na puarter ruangah na thluak an theih dih ruangah hi bantukin a rak post le thlahnak si cu. Zeitluk in an chim an rel zongah ca reltu keimah nih zoh lo le dai tein ka um ko ahcun peh zulh loin an kaltak colh ko lai. Kanmah ca tthat hnemnak a chuahpi tu le ca ttha ttha rel duh loin hi bantuk luk malak kah fuh dih ruangah mah bantuk lawngte an thlahnak le chimnak cu a si ve cu.

Cucaah Media sualnak le palhnak lawngte hmuh loin ca reltu kanmah palhnak zong hi thei ve hna usih. A herh cun kan peh tthan te lai, Ka lawm.

Leave a Reply