RALCHANH IN A NUNGMI LAIMI KHRIHFA: “PARADOXES IN THE CHIN CHRISTIANITY” 1. Laimi hi vawlei cungah abuaktlak “percentage” in Baibal siangin a kai tam bikmi kan si ka zumh. Abuaktlak in Baibal degree a laa tam bikmi miphun kan si ka zumh. Asinain Baibal thiamsang “Baibal scholar” a nei bak lomi miphun kan si. Kei zong kai tel.

2. Laimi hi vawlei cungah abuakthlak in Pathian rian a ttuan tam bikmi miphun kan si ka zumh. Asinain vawlei cungah min nei ngaingai le minthang tiangin, vawlei pi theih awk in Pathian mihman a nei lomi miphun kan si. Kei zong kai tel. 3. Laimi hi vawlei cungah abuaktlak in Baibal siangin a tuah tam bikmi miphun kan si ka zumh. Asinain siangin minthang kan dirh khawhmi a um lo. Kei zong kai tel ve.

4. Laimi hi vawlei cungah abuaktlak in Khrihfabu “denomination” a tam biknak ram pakhat a si ka zumh. Asinain Khrihfabu phun kip kan dirh cu zumhnak ruangah si lemlo in pumpaak i rem lo ruang le lahkhah ei duh ruang, hlimlaam duh ruang le miphun dang rem lo ruangah an si ngawt. 5. Laimi hi vawlei cungah abuaktlak in crusade le campaign a tuah cemmi miphun kan si ka zumh. Asinain zumhnak, dawtnak, peeknak le ttuannak ah miphun dang nakin a tthangcho hlei lem lomi miphun kan si.

6. Laimi Khrihfa hi vawlei cungah hlimlaam a uar cem mi miphun pakhat kan si ve ka zumh. Laam a um lo nak hmun ahcun crusade tuah khawh a si ti lo. Mipi nih pumh an zuam ti lo. Asinain laam le kui tiang lawng ah kan i zaa hna i thil ttha dang hawi hlei in kan tuahmi a um lo. Hawi hlei in a laam mi nihcun hawi hlei in thil ttha dang zong khi a tuah kho ding kan si nain.

7. Vawlei cungah Laimi hi holhtheihlo a uar bikmi miphun kan si ka zumh. Khrihfabu cheukhat ahcun holhtheihlo hla an sak caan a sau tuk caah chiarman nih pumhnak caan a thlai kho ti lo, solo le thawhlawm khawlh vialte an cancel dih. Phungchim zong an cancel dih cang. Pumh thawk bakin holhtheihlo hla in an i thawk i holhtheihlo hla in an dong. cutlukcun an uar.

Asinain a let kho tu pakhat hmanh an um bal lo nak ram cu Lai ram tthiamtthiam a si. Paul nihcun a let tu um hrimhrim hna seh a ti. Laimi nihcun a let kho tu an um lo zongah a poi loh kan ti. Paul te hna bia cu ti deuh a si rua. Holhtheihlo i holh hmanh hi an i leh palhmi Baibal lawngah a um va si kaw, holhtheihlo hlasak cu an i leh palhmi Baibal hmanh ah a um lo. Asinain Baibal i a um lo zongah a poi lo an ti. Kanmah kan i nuamh ahcun a zaa ko an ti. Dr. Aung Myint Thang