Kalay peng Indaingkung sang (ahlan Myohla khua) ah ummi kum (5) chung zeng dam lonak in a zaw cangmi piter kum (89) tlaihhremtu pa cu tuchun ah Kalay district nih thihnak an pek tiah kan theih.

Taya Hluttaw sihni U No Hmung nih a chimmi cu,“Thihdan an pekmi cu hri in thlaithah ding (hri in thih lakin thlai) ti a si. Zeiruangah dah kan ti ahcun kum 7 nak in tam thlak khawhmi sualnak a tuah, cu hleiah mi nunnak a lak rih.

“Tahchunnak ah pukmah 376 hi tlaihhrem case a si i kum 20 tiang thong thlak khawh a si. Mi a tlaihhrem hnuah a nunnak a lak rih caah thihdan an pek hi a si. Zei tik dah an thlai lai (thihdan an pek lai) ti a ni le caan theih fian a si rih lo. A tlaihhremtu lei nih Nay Pyi Taw ah dan an tatmi cu ṭhumhpiak (sawhpiak) deuh ding nawlnak a tuah khawh lai. Cun, President sin zongah nawlnak a tuah khawh tikah thil dangdang a cang khomi a ummi caah zeitik ah dah thlai a si ti kan chim kho lo,” tiah a chim.

A hlan i a rak tlaihhremning cu atanglei i kan langhter bantukin hi a si.
Kalay khuapi, Eindain sang ah zeng zawtnak in a zawmi kum 89 upa pitar pakhat cu Zaw Myin Thun (kum 40) timi pa nih 2020 June 19 suimilaam 6:20PM tluk ah a tlaihhrem ti thawng kan theih. Lung a nuam lo ngaingai. Pitar a si lawng hmanh si loin amah hi a hnachetmi a si tiah theih a si fawn.

Khualipi ah a ummi Myomin Htike ni a facebook ah ataarlanghning ahcun, “U Zaw Myint Thun nih a tlaihhremmi kan pitar cu suimilaam 11:50 PM tluk ah a nunnak a liam,” a facebook cahmai ah a taar. Zaangfak ngaingai a si ko.

Hi tlaihhremnak kong he pehtlai in Dingdi Organization phu (nu pawl cawlcanghnak phu pakhat a simi) i pakhat nih cun, “A tlaihhrem ti thawng kan theih hnu ah kan va kal. A hmun kan va phak ahcun tlaihhrem a tong mi kan nu hi a thirh in a rak thirh cang. Cun, a taksa a duk. Kan nu hi holh cu a holh kho rih. Amah hi a hna chetmi a rak si. A hnakchetmi a si tikah a tlaihhrem tu pa nih a luh hnawh le luh hnawh lo zeihmanh a thei lo.

“A tlaihhremtu nih a luh hnawh ahhin a chung le hi coka ah an rak um. A tlaihhremtu pa nih a luhhnawh hnu ( a tawngh hnu) in a au i a chung le nih cun a au aw theih an zuanhnawh colh. An au thawng cu pawngkam minung nih an theih hna cang ka in an zuanhnawh cio hna i atlaihremtu pa cu an tlaih khawh. Palik nih thil sining an hal tikah atlaihhremtu pa hi Chouh khuapi ah a ummi, a si,” tiah a chim.

Kum 89 a tlaihhremtu pa U Zaw Myin Tun cu Kalay Palek nih an tlaih i Palik sakhan ah an chiah tiah theih a si. Chirhchan: Zalen