Thawngpang ṭha tuk asi. China ngakchia pate cu mifir nih kum 2 hnih mi a rak si lioah an fir i kum 32 hnuah hringtu a nulepa taktak a hmuh ṭhan tiah theih a si. Cu an firmi pate cu a min ah Mao Yin hi ti a si. Mao Yin hi kum 1988 lio ah khan Xi’an city, Shaanxi province in Central China ah hotel kutka hram a um lio ah mifir nih an rak fir.

Sichuan province ah nupa tuahkhat nih an fapa ding caah an rak i lak. Amah hi ngakchia zeihmanh a thei kho rih lomi a si caah mifir nih an fir i midang sin ah an zuar chinmi a si hi pakhat hmanh ai theih kho loh. Kum 30 chung cu a nu le pa nih an si khawh chung in hmunkip ah an fapa hi an kawl i a konglam heh tiah an dothlai lengmang ve.

CCTV nih an langhter ning ah cun, Mao a nu le pa nih hin a hngakchia lio hmanthlak Facial recognition hmang in an fapa hi an hmuh khawh, tiah an langhter. Mao hi atu ah cun kum 34 a tling cang. A hringtu a nu Li Jingzhi nih hin a rianṭuanmi tiang dinh takin a fapa kawlnak caah 100,000 flyers a buaipi. TV channels dang dang ah a fapa cu inn ah rak lawi dingin a sawm lengmang tawn. A fapa an kawlnak ah hin minung 300 hrawng bak nih an fapa umnak kan theih tiah an rak dehcawh hna.

April thla ah khan Police pawl nih Xi cu kum 1988 i a rak tlaumi an fapa a si men lai tiah an zumhmi pa pakhat cu Sichuan province ah an va hmuh. A DNA cheknak (test) an tuah i , kum 30 lengkai an rak kawl cangmi an fapa Mao cu a rak si taktak.

Mao a rak i cawmtu hna nupa nih hin Gu Ningning tiin min dang an rak i sak. Kum 30 chung cu an fir i an zuar timi ai theih bak loh. Asinain kum 32 chung midang sin i a um hnuah atu cun a hringtu a nu le pa taktak he an i hmu. Mao Yin a rak firtu hna nih atu i Mao Yin a rak cawmtu nupa sinah hin 6,000 yuan (£690, $840) in rak zuar tiah theih a si. Ref: BBC