Kum 2019 Hi CNF Caah Kumttha Kum A Si

CNF AGS-3 Pu Htet Ni cu USA ram i kan Chin miphun umnak khuakip ah thla 6 chung mipi he tawn biaruahnak a ngeih dih hnu in kan Chinram lei ah nihin a kir. Nizan kha USA ah a um mi CNF vialte aiawh in CNF USA Regional Committee Chairman Pu Tial Hmung he thlahnak lunch kan va ei pi. Can sau pi USA ah nan can nan pek, reitheih nan in ruang ah USA ah CNF dirhmun tthawng chin chin in nan rak tuah mi cung ah kan ni lawm hringhran tiah lawmhnak bia kan chimh.

Nihin Indianapolis airport ah kan nau pa Zaw Zaw he Pu Htet cu kan va thlah. Nangmah lawng na si lai i na um a har pah lai hi ta tiah kan ni cheih len. Kan ni ceih ning a rak si lo, airport kan phanh ah cun Rangoon lei a kal ve ding All Chin Society of Yagon i an Chairman Rev. Hung Saw le Matupi in kan pa Pu Bung Kung a rak thlah tu pawl kan tawn hna.

An vanlawng an ni cit ding Indianapolis – Chicago, Chicago-Hong Kong, Hong Kong-Rangoon aa khat dih. International flight ah Chinmi phun mah ti ban tuk kan ni tawn hi a tu a veikhat nak a si lo. A tam ngai i, keimah zong kan tawn pah. kan miphun le kan miphun ruah lo pi in khual lam ah vun i tawn i vun kal tti khi a nuam ngai. Pu Htet cu kan ni lawm ka ti, an 3 an kut ka thlaih hna hnu ah, vanlawng ah nuamte in an kai tti.

An pa 3 in Vanlawng pakhat an kal cu an mah nak in keimah kaa nuam deuh rua ka ti. Kan pa le chan ah Rangoon, Mandalay hmanh an rak phan kho lo nain, nihin kanmah chan ah hin cun vawlei vialte hi Chinmi kan khuasak nak le kan khual tlawnnak a si dih ve cang ko mu ti mi lung ah a cuak, mit in vun hmuh a si tik ah nuam lo khawh a si lo.

Sammual Hrat Hmung a hla i.”a tu kan chan ah hin zingnu na ttha tuk ee.”a ti mi hi mah bantuk te hi a si ko. Nain,khat te lei ah lung ah a chuah chih mi cu hi tluk Chin miphun pathian nih caanttha, dirhmunttha a kan pek ve ko bu in kan Chinram, kan Chin vawlei mi sin kan phanh ter ah cun santlai lo tak tak kan si lai mu ti hi a si.

Kum 2019 hi CNF caah kumttha kum a si. CNF kan pa le pawl Dr. Lian Hmung Sakhong, Pu Thla Hei, Pu Thang Yen, Pu Pa Hmun, Pu Htet Ni, Ralbawi hlun Lt. Col. Hre Tling pawl USA ah saupi cam in an rak kan tlawng kho. A can an pek man a phu hringhran. Mipi he tawn biaruahnak hi Pakhat hnu Pakhat an ni tthuanh chih lengmang i mipi an kan hminh ngai ngai tiah kan ruah.

Atu lio tluk hin USA i kan Chin miphun nih CNF an ttanh hi a um rih lo. A tu cu a dang kan pa le vialte cu kan Chinram lei ah an kir dih cang i Lt. Col. Hre Tling (Pu Hre) lawng a tang. Pu Hre zong mipi he tawn rih ding tampi a ngei rih. USA lei a rak kan tlawngmi Pu Htet, Pu Hre le CNF kan pa le vialte nan cung ah kan ni lawm.

Credit: Daniel Sakhong