Kuchah Khuami Tlangvaal Lian Za Thang (Khupchon) Nih Thangzang Khuami Velh A Tongmi Pa Ngun Dawt Sing-200000MMK Bawmhnak A Pek
Hakha ah a ummi Thang Zang khuami pa Ngun Dawt (kum 15 tluk) cu Hakha a ummi vemi Tiphul khuami Tlangvaal Rual Bik Thawng le a hawile nih an velh. Cuti an velh lio Video cu social Media ah a hunglinsa ngaingai. Cun, velh a tongmi Ngun Dawt hi ngakṭah a si tiah theih a si fawn.
Ramchung, ramleng nih an velhnak video cu hmuh cio le zoh cio a si tikah, an zaangfak cio. Cheukhat nih anmah le si khawh tawkin bawmhnak an pek ve. Tutan zongah Kuchah khuami tlangvaal Lian Za Thang(Khupchon) nih June 06|18|2020 ah ting 200000MMK bawmhnak a pek. Cu a pekmi bawmhnak cu Ngun Dawt a Pu nih lunglawm tein a cohlan tiah kan theih.
Velh a tongmi Ngun Dawt hi atu sizungah a um ko rih. Halkha palek zong nih atu hi hlathlainak an kalpi cuahmah lio a si. Cun, a veltu chungkhar pa 5 hna nih velh a tongmi Ngun Dawt te chungkhar hna zong tonnak an ngeih cang hna. Asinain Ngun Dawt chungkhar lei nih kanmah chungkhar kan i tong hmasa lai tiah lehnak an tuah hna.
Velh a tongmi Ngun Dawt chungkhar lei nih siseh hlathlainak a cuahmahmi Palek lei zong nih atu tiang cu thil sining zeihmanh an chim fian kho rih lo. Thawngpang thar a um cun a si khawh chungin thanhṭhan khawh kan rak izuam lai.
Bawmhnak a petu Lian Za Thang (Khupchon) konglam tawi;
Tlangvaal Lian Za Thang (Khupchon) hi Kuchah khuami a si i, atu Norway ah khua a sami (a ummi) a si. Norway ahhin a kum in kum 13 leng a um cangmi a si. Cun, amah hi Pathian rian ṭuan hram aithokmi a si. Bochan awk tlak taktak Mino a si. Mipi tampi nih a rianṭuanning le a cawlcanghning kan thei tuk lo kho men. Amah hi upatnak awk tlak taktak mino a si. Pathian caah tiin karhlan hram aa thok cuahmahmi a si.
Kan Laimi chungin a awṭha ko nain le hlasak a duh tuk ve ko nain, Studio luhnak a ngei lomi tibantuk pawl hna cu sponsored a tuah (bawmhnak a pek) hna. A tanglei ah a rianṭuannak a page le group zong kan chiahchih i pehtlaih khawh zong a si. Amah nih sponsored a tuahmi Pathian thangṭhatnak hla zong a tanglei ah kan rak langhter chih. Hihi Ngun Dawt bawmhnak a petu Salai Lian Za Thang (Khupchon) a konglam tawi kan langhter chih duhmi a si.
A Youtube Channel rak leng chih
Ngun Dawt an velhning le a konglam tawi;
Ngun Dawt, kum 15 tluk tlangval hi Thangzang khua mi, Pu Sang Kam (Tleicia) le Pi Ngun Taang (Tleicia) hna i an fale hna 3 lakah a hniangbik a si. Kum 2 a si ah a pa nih Malaysia ah a thih taak hna, cu tlawmpal ah a nu nih a thih taak. Halkha ah umnak a ngeih lo caah Hniarlawn khuami, Pi Zing Hlem sinah aa dormi a si.
Amah hi taang 9 a kai liomi a si i nulepa nih thih taakmi ngaktah buangro a si. A luan zarh chungah Cycle cung tluknak in a kut aa rawk caah sizung ah a hliamhma a tawl lengmangmi a si. Atu hi sizungah an um lio a si. Hi vial hi Ngun Dawt konglam kan rak langhter chih duhmi a si.
VIDEO timi hmehpiak (Click law) avelhnak video zoh khawh a si lai.