By Salai Pa Thawng|Australia|01|09|2020||Kan Vote Hi Man A Ngei Tuk. Ks 20000 meimei ruangah kum 5 chung hruaitu thimnak ah kan vote kan zuar sual ahcun lih cikcek kan si lai. 20000 cilu chikhat va nain kan vote pakhat te hi kum 5 caah a si i kum chung hruaitu naa thim thiam ahcun Ks 20000 nakin a let in na hmuhding a tam lai.

A mikip mirum le sifak le upa le hngachiah le mifim le mihrut kan i tlukruannak cu vote pakhat cio kan ngeihnak ah hin a si. Vote pakhat voikhat kan thlakmi nih kum 5 chung caah man a ngeimi a si caah chikhat lungthawhnak men in vote kan thlak sual ahcun kan i palh kho.

Laimi tampi cu chikkhat ca te men lawngah khuaruat mi kan tam tikah kan i palh sual hi a hung um pah tthan tawn. Cucaah tutan tal hi cu lungsau tein khuaruat le lungfim tein vote kan thlak ding a biapi tuk hringhran. Kum 2015 ah Media dirhmun in ngiathlaitu ah kaa tel ve i me an thlakmi ka zoh tikah NLD an thlak dih. Zeicahdah NLD ah mee na thlak tiah ka hal hna tikah NLD ah mee ka thla lo Suh Kyi mee ka pek a titu an tlawm lo. A ruang cu Suh Kyi inn thong in a hung chuah le landslide ruangah Suh Kyi nih mi tampi thinlung ah hmunhma a lak. Mipi pa hmanh nih teinak hmuh tiangin mee an pek. Cucaah tutan cu kan thlakmi hi ho set hi dah mee kan thlak i kan pek ti kan i fian bak a hau.

Cucaah nang le kei nih kan ngeihmi vote te hi chikkhat te ah thlakmi a si tikah man ngeilo a lo nain kum 5 chung hruaitu ding thimnak a si caah a man fak tukmi a si caah Kyat 20000 meimei in kan vote kan zuar sual lo ding a biaoi ngai ngai.

Note: Caṭialtu Salai Za Thawng @Pa Thawng hi Australia ram ah a um liopi a si. Amah hi India ram, New Delhi Donbosco (UNHCR) ah kum saupi holh let rian a rak ttuanmi a si. Cun, New Delhi Hakha Community a secretary zong can saupi a rak ṭuan cangmi a si. Chin ralzaam caah biak tein a rak cawlcangmi a si.