Washington D.C Capital Hill Ah Khuaci An Mui: Trump Supporter pawl nih fir chom in thimmi, President kan duh lo, election result a khupthal leh a herh” tiah Washington D.C khuachung ah dohaunak an tuah, President Donald Trump zong nih biachimnak a ngei. Biachimmnak a dih hnu ah lam an zawh i, US hluttaw palai pawl meting an tuahnak Capital innpi cu an va fuh i, minung an tam tuk caah Palek nih an kham khawh hna lo caah a chung tiang zong an va luh hnawh hna.

Thil hrawh, meikhangh le thil fir cu a um lo. Black Lives Matter pawl kha cu si hna sehlaw thil an hrawh lai, mei an duah lai i, thil an fir lai tiah ka ruah. Asinain Palek le supporter pawl an i phomhnak ah palek nih minung pakhat thi chuak laak in an kah ti a si. Capital hill ah meting a tuah liomi, Senator pawl le House Representative pawl cu an himnak dingah an chuahter dih hna ti a si.

Senate le House palai dihlak komh in Electoral College vote zohfelnak an tuah i, Arizona state result an zohfel lio ah Republican party nih an dohkalh caah meting chairman a tuahmi, Vice President nih meting a ngolter hna i Senate le House ah a dang tein debate an tuah. Mah debate an tuah lio ahcun Trump Supporter pawl nih an luh hnawh hna caah an meting zong an tuah kho ti lo.

Tuzan zan sumilam 6 leng chuah lo dingah Washington D.C khuabawi nih curfew a chuah caah zeidah an lawh lai chim awk a tha rih lo. Washington D.C khuapi cu Trump supporter pawl nih lam an zawh hnawh hna caah nawisen an hnuk i khuaci an muih saling a si. Credit: Salai Lairamthang