Khuachiabu Le Khrihfabu Thleidan Khawhnak

Chin News

Khuachiabu Le Khrihfabu Thleidan Khawhnak

Jesuh cu Gergesa mi hna ram kha A va phan.Cu tikah khuachia nih a tuahmi pa pahnih kha thlan hmun in an ra i Jesuh cu an ra ton.Cun ruah lopi ah,”Jesuh,nangmah he cun zeidah kan tuahti awk a um?A caan a phak hlan i kanmah hrem awkah maw hika ah na rat cang?,” tiah an au(Math 8:28-29).Jesuh nih,”Na min hodah a si?”tiah a hal.Mipa nih,”Tampi kan si caah ka min cu “Bupi” a si,tiah a ti.

Hi zawn ah langhter ka duhmi cu Jesuh an hmuh le cangka in,”Kanmah hrem awkah maw na rat cang?,”tiah khuachiabupi nih cun an ti.Tu chan zongah hin Jesuh Khrih Thlarau a comi thawngtha chimtu nih khua pakhatkhat an va phak tikah Jesuh kong le A min khamhnak kong an chim tikah cu Jesuh kong chimtu Khrih Jesuh Thlarau comi Saya cu ,’Kanmah bu doh le bu hrawh ah na ra.Bu hrawktu na si,ti a hmangmi bu,khrih zumtu khrihfabu kan si iti tung i Jesuh Khrih kong chimmi bia theih paoh ah a ingpuangmi bu,bu hrawktu ah ruah a hmangmi bu hi lunghrin awk tlak bu an si.Jesuh an hmuh le cangka,”kanmah bu hrem/hrawh awkah maw na rat cang,”a titu Khuachia bu ruahnak le riantuannak he an idannak um lo.

Khrih Zumtu Taktak Simi Khrihfabu Cu Hitihin Hngalh Khawh A Si

Related image

Jesuh pawitu Mary cu Tipilpetu Johan pawitu Elizabeth sinah a va kal.Zekhariah inn ah khan a vun lut i Elizabeth cu a vun biak.Elizabeth nih Mary i a vun chawnhnak bia kha a theih tikah a paw chung i a fate cu a cawl.Elizabeth nih,”Zeicahdah ka Bawipa nu nih hin na hung ka tlawn?Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu(Luk 1:39-44)tiah a ti.

Pathian Thlarau hruaimi/Pathian Khrih Thlarau a pawimi Khrihfa nih cun Khrih Jesuh kong thawngtha pawitu/chimtu an phak tikah le cu an pawimi Jesuh min kong an chim tikah lawmhnak in an khat tihi Cathiang chungah kan hmuhmi si.Nihin nih khrihfabu iti ko tung i Khrih Jesuh kong chimtu nih a chimmi Jesuh kong bia theih paoh ah bu dohnak le bu soiselnak,bu hrawhnak kong lawngte nan chim ,”ti in soisel le thangchiat hmangmi khua le ram le bu pawl hi lunghrinh awk um ngaimi bu nan si.Khrihfabu iti ve tung i Khrih kong bia theih hmanh ah a ilawm kho lomi bu hi lenglei signboard lawngah,”Khrih-fa-bu” chung lei ziaza le lungput in a chuakmi bia cu Jesuh kha anmah bupi hremtu/hrawktu/bu dohtu awkah a ruatmi Khuachiabu sining langhtertu si ko.

Related image

Farasi pawl nih,”Pathian lawng2 pei kan Pa a si ko cu. Lakfa kan si tung lo,A fa taktak pei kan si cu,” tiah (John 8:41) Jesuh kha ninghngal ngai in an chim hnawh. Jesuh nih,”Nannih cu nan pa khuachia fa kha nan si i tuah nan duhmi cu nan pa duhnak kha a si,,,,,(John 8:44) tiah a ti hna. Anmah ruahnak ah Pathianfa an iti nain Jesuh thinlungah Khuachiafabu an si ko.Tu chan ah Jesuh kong chim paoh ah a ingpuangmi khrihfabu aa timi hna hi Amah kong chimmi Jesuh nih ,”Hihi Ka khrihfabu an si,”tiah an ti hna hnga maw? Khuachia fabu na si le si lo cu Jesuh kong chimmi bia na theih tikah a ingpuangmi na sinak nih khan a langhter ko i Khrihfa na sinak tak cu Jesuh kong chimmi bia na theih tikah lawmhnak in a khatmi na sinak nih khan a langhter ko lai.

Credit: Manghei Thangz

Leave a Reply