Pathian rianttuantu kan si tikah minung lei hlawtnak lawng ruat in kan rianttuan ding a si ahcun ttuan lo lawlaw a ttha. New Jersey nu Taisha Smith-DeJoseph kum 43 nih Khrihfabu tangka a fir ruangah an tlaih tiah theih a si. Folorence, St. Paul’s Baptist Church i ngunkeng a si i Khrihfabu min in Bank Accouns tampi a tuah.

Kum 5 chung Khrihfabu ngunkeng rian a tlai cang i cu a tlaih chung ah cun phaisa tampi a fir lai tiah an ruah. An zumhning ah cun $561,777 hrawng cu a hman lai tiah an zumh. An tangka a tlamtling lengmang lo ruangah Khrihfa Upa pakhat nih Financial Crimes Unit hna auh in hlathlainak an tuah.

Cuticun, hlathlainak an tuah tikah Taisha Smith-DeJoseph nih Khrihfabu min in Bank Accounts tampi a tuah-ser ti an theih. Ahmannak vialte zong an theih dih i, kuthrolh, mo thuam, Motor loans man le inn man tiang a pek peng ti an theih. Amazon i a cawknak (Transactions) Paypal zong an chek tikah $266,000 man thilhruk fan-aih a cawknak manh tiah theih a si fawn.

Ngunkengtu a si bantukin Khrihfabu in tangka a lutmi le Funds kawlnak in tangka an kawlmi an hmuhmi paohpaoh cu a kut cungah ap le chiah peng a si. Cuticun, Bank Account a tuahmi ah a thun hna i a duh tik caan paoh a hman hna tiah theih a si i a tu cu palik kutah a um cang.