Khrihfa nih kan chilhmi Myanmar Idol: Myanmar ramkomh pumpi ahhin Buddhist biaknak hi 89% an si. Cucu cohlan dihmi a si i, Buddhist biaknak ram ti zong ah kawhmi a si. Kan nih Khrihfa mi cu 6.2% telawng kan si. Asinain nihin Myanmar ramkomh chungah Khrihfa mi kan langh dan hi khuaruahhar ngai a si ve ka ti. Hitluk mitlawm te hi a bikbik ahkhin Pathian nih a kan thlir taktak ko. Buddhist biaknak he hin milu hi hun u thleng tuah usihlaw Asia ram ’48’ hi ka zenh lem hna lo. Cucu a hun kau ngai.

Khrihfa mi hna nih ringawn ah kan langh khunnak hi a tlangpi in kan Biaknak nih kan Pathian thangthatnak hla kan sunhsak ruangah a si ka ti. Buddhist mi hna hi hla cu an sa ve nain an hla khi zapi tonghci a si lo. An khuang le an bel, an bia an hla cu khuaruahhar asinain zapi huap nih tongh khawh phun a si lo. Kan nih Khrihfa mi cu kan hngakchiat tein Sunday School ah hruai le cawnpiak kan simi hna, kan tualleng sianginn le Khrihfa nunzia dawh in cawnpiaknak hna hi mi ah a kan chuah tertu biapi taktak an si ve.

Nihin Myanmar Idol thawknak hmanthlak cu Judges pawl nih kulh bu tein thlacamnak tein an hun thawk. Phyu Phyu Kyaw Thein nih thla hi cam sehlaw ka dawhter. Hi hmanthlak ka zoh ahhin Khrihfa kan sinak, mitlawm te kan si ko bu ah Myanmar rampi kan chuanvawr Idol zuamnak kan chilh ko tihi ka hei ruat.

Voikhat ah Kawl Tingtang tumthiam bik Iron Cross hruaitu Chit San Maung nih bia a chimmi kai chinchiah rih. Iron Cross nih nihin tiang kan lamtluannak hi Pathian lamhruainak thawngin a si. Show kan tuah lai ahhin kulh bu tein thla kan cam peng. Caan cheulhat ahcun kanmah lila kan philh tawn. Asinain kan hawi le Irin Cross chungtel Buddhist hna nih “Thla kan cam ta lailo maw” tiah an kan ti tawn tiah a chim.

Khrihfa nunzia dawh nih kan rampi hi chilh ko seh ti hi Chinmi kan saduhthah a si awk a si. Kanmah tlangcung mi lawng Khrihfa kan si lai ti cu a paam tuk. Kan ram ah hlasakthiam, hruaitu, milang hna hi Khrihfa nunziadawh in a thangmi siter hi kan chunmang a si awk a si bantukin Pathian nih a kan pekmi Mission zong a si kolai. Myanmar Idol, Pathian nih thluachuah pe ko seh. Hmaizarh ah Esther, Sum Sum le Yaw Kee hna hi a hmun in thazaang pek ding kai tim. Tukum cu Chin mi nih Myanmar Idol tlai usih. Ruahchannak nganpi he Salai Tial Hram Ling Yangon