Khrihfa nute (Kum 15) amah le mah a thah hlanah a nu bia a cah taak hna- Lessons for all familiy. Kanu, a tuarhar tuk ko lai nain, na caah i hi ca ka ṭial lioah zeitluk in dah na tuar ve lai ti ka ruat tuk ve ko ee.

Ka nu, kan dawt, kan duh tuk ti hi ka theihpiak hram mu. A nungṭhan ding si law nang cu ka nu si dingah kan thim ṭhiamṭhiam ko lai. Kan innchungkhar zong chuah semnak inn si dingin ka ka thim ṭhiamṭhiam ko lai. Asinain cu bantuk caan ṭha cu ka caah a um ti lo.

Kanu, hibantuk thil tuah hi ka duh hrimhrim lo. Asinain keimah le keimah i ṭhin dingin thazaang ka ngeih ti lo caah ka duh lo bikmi mah le mah i thahnak tiang ka tuah hi a si. Ka si khawh chungin tei dingin ka zuam ve nain ka thazaang nih atlinh lo. Keimah lawngin thla 13 chung ka doh nain ka thazaang nih a tlinh hrimhrim lo.

Kanu le kapa nanmah nih cun nan ka theihpiak kho lo men, asinian keimah zong nih kan mawtchiat hrimhrim hna lo. Ka ṭa ngeihchun David nih nikhatkhat ahcun a theihthiam te ko lai a tu cu a ngakchia tuk rih i. Kanu le kapa nan ka dawt tuk caah nan ka dawtnak langhter in zei thil paoh nan tuah nain nan ka dawtnak hi ka theithiam kho lo. Ka duhmi thilri nan ka cawkpiak ka hawi le nih an phak bal lonak hmunṭha, hmun nuam nan kan ka kalpi ko. Asinain ka sining tein a ka dawtu, ka thinlung tuarnak tuarpitu le theih hngalhpitu ka thinlung nih a hlam ṭhiamṭhiam ko rih. Thilri tampi nan ka cawkpiakmi le thil tampi nan ka tuahpiakmi nih an ka hnem kho lo. Keimah lawng lileng um har tuar cu a har ko ee.

Kanu, na ṭapa ka pu Tony nih cun ka thinlung tuar innak a ka theihpiak. Hawikom ding siseh, nuamhnak tuahpi ding a ka theihpiak. Asinain nangmah le kanu cu nan rianṭuannak ah ka umharnak nan thei lo. Ka pu Tony nih cun kan inn ah a rak ka umpi tawn.

Hawikom ngei loin Monu lem he lawng kan um i kom in kan um tawn. Asinain Tony ka pu nih a rak ka hnemh tawn i amah cun kan i capo i kan ei ding ṭi tawn i nuam taktak in kan rak um ṭi. Caan a hung sau deuh tikah kapu Tony cu ka duh tuk i ka hruhpi. Amah loin ka um kho lo, ka tlaihchan fawn. Asinain cuti ka duhnak le kaa hruhpinak cu kapu Tony caah caan ṭha a rak si i, kei caah ngaihchiatnak ah a cang.

Kanu, na ṭapa Tony nih a nupi bangin kum 3 tiang a ka sualpi. Kanu le kapa, nanmah nih nan ka theihthiamnak hnga tiah ka rak i zuam nain, zeiti hmanh in nan rak theithiam kho lo. Kan inn a rat ti lo hnu cun ka lungthin a kekkuai, ka lungsi vang, ka lia leng, nu le pa nan um lo ruangah ti lei ka ruah tikah kan lungfah ka celh lo. Amah zong ka mawtchiat dih thlu lo. Zeiruangah ti ah cun keimah a ka umpi duh ti lai lo ti ka phang. Canada ah a ka kal taak hnu cun kei cu umhar tuar in le lileng ngaichia in ka um i nun ka huam ti lo hi a si. Cucaah a si, ka nu ka sianginn kaimi Mark zong a tlakniam tuknak hi a si. Asinain nannih nih cun, tuition cawnpiaktu nan ka lakpiak. Si kho sehlaw kapu Tony aiawhter tiang ka duh asinain a si kho lo.

Kanu, chim ding dang ka thei lo, hihi ka tuah aherh ko ka umhar tuk hringhran. Kan innkhan chungah keimah te lawng ka rak um lengmang ti ka ruat bal maw? Tu hnuah voikhat tel hmunkhatte biaruah ṭinak a um ṭhan kho ti lai maw? Kanu, a liamcaan kong chimh ding tami ka ngei. Asinain na lungfahnak zualtertu men a si lai cu kong cu ka thlankhur chungah i ken ko ning. Kanu, ka bank cazin le ka phone screen number, ka laptop number vialte na hniphuan chiahnak pizu (drawer) chungah ka rak chiah dih. Kei cu atu ka kut chungah a ummi thihsi ka kaa a phak cun zeizong vialte ka tuar innak le ka umharnak vialte a dih cang lai.

Kanu, kapa le ka naupa David zong ka dawt tuk tiah ka chimhpiak hna mu. Cun kan Pastor pa zong ka philh kho lo a thawngṭha chim le a thlacam zong ka philh kho lo, ka chimhpiak mu. Ka hawilekom zong nih ka mawtchiat hram hna hlah seh ti bia ka cah piak hram mu.

“Goodbye Ka dawtmi Kanu”

1. Nu le pa hna, nan fale hna caan pek manh lo ding tiangin rianṭuan ah nan buaituk maw. Nan fale he caan hman ṭi manh lo tiangin a biapi ah a chiami nan um maw? Nan fale  caan pe hram hna uh.

2. Nan fale sinah nan dawtnak hna theihter hna uh, chim phuang uh, cun anmah bochantu dingin ram um in chim lengmang hna uh.

3. Tulio online media ah mah le mah i thahnawnnak thawngpang  theih dingin a khat. A tam chinchin lai.

4. Ruah ṭha ngeiin fale hna an buainak theihpiaktu le tuarpitu siin an bia ṭha tein ngaih piaktu le anmah mawhchiat in sualpuh lengmang lotu nu le pa si i zuam cio uh. Nan fale thinlung labiktu le an hawikom  ṭhabik zong si i zuam hram uh.

5. Biaṭha a hmanmi cawnpianak in nan fale hawikom hna ulaw, ahman cawnpianak le a ṭhami ṭhancho he hawikom hna uh.

6. Harsatnak le palhnak lak zongah thape thiamtu le an hlawhtlinnak cungah lawmhpi thiamtu nu le pa si hram uh.

7. Nu le pa hna, nan fale pawlih duhdawtmi, rinsanmi, nelmi, umpi duhbikmi si ringring hram uh. Nan nauhak lai nu le pa siter nan duhdan vekkhan nan faate parah nu le pa dinhmun la theitu si rak zuam ve hram uh. Nu le pa hna, nan fale nih tlaihchanmi le duh dawtbikmi si in fale ca herh caan a ummi si i zuam zungzal uh. Fale nih tlaihchan bikmi le hlam bikmi si rak i zuam hram uh.