Khrih Vailam Riantuannak. (The Work of the Cross of Christ).

Sermon

Khrih Vailam Riantuannak. (The Work of the Cross of Christ). Khamhnak kong kan chim tik paoh ah, khamhmi, Khamhtu le khamhnak caah hmanmi, tiin phun thum a tlin lawngah Khamhnak Thawngtha a tlamtling kho. Khamhmi cu Misual, Khamhtu cu Jesuh Khrih asi i Khamhnak caah hmanmi cu Vailam le Thisen a si. Thisen riantuannak cu sualnak ngaihthiam caah a luang i Vailam cu misual thahnak a si. Vailam cu thih tlak sualnak a ngeimi hna thahnak a si. Thisen riantuannak cu a hnuah ka tial te lai. Khrih Vailamtah riantuannak cu phun hnih a si.

1. Misual Aiawh In Jesuh Khrih A Thihnak (The Substitution Dead of Jesus Christ for the Sinners)
Jesuh nih Vailamtah cungin, “Aa Liim Cang,” (It is finished) a ti tikah zeidah a liim tihi kan hngalh a herh. Rom 6:23 chungah, ‘Sualman cu thihnak a si,’ timi kan hmuh. Jesuh nih a liim mi cu sualman thihnak kha a si. Jesuh nih thihnak tlak sual a ngei maw? 2 Kor. 5:21. “Khrih cu sual ngei lo (hngal lo),” a si. Sual ngei lo Jesuh Khrih Vailamtahnak i a thih cu misual nangmah le keimah aiawh in a kan thihpiakmi a si.

Sualman thihnak kan Leiba cu Jesuh Khrih nih Vailamtahnak ah a kan champiak dih cang. Rom 5:8. Asinain Pathian nih cun zeitluk in dah a kan dawt kha hitihin a langhter: kannih cu misual kan si ko rih lioah hin Khrih cu kan caah a thi. Kol. 2:14. Kan leiba tialnak ca cu a chung i a ummi upadi vialte hna he khan a hrawh dih cang i vailamtahnak cung i a khenhchihnak thawng khan kanmah dawntu siti lo dingin a hlonh. Misual aiawh in Jesuh Khrih nih vailamtahnak ah sual leiba a cham dih cang caah, “Na sual lo,” tiin biakhiahpiak kan si cang. (Rom. 5:16). Hi thawngtha hi misual dihlak caah asi nain keimah caah asi tiin zumhnak in a cohlangtu lawng nih co a si. (1 Tim. 1:15).

2. Khrih Le Misual Thihtinak (The Dead of Christ and Sinner) Khrih vailam cu misual aiawh in Khrih a thihnak lawng silo in Khrih le misual thihtinak zong a si. Galati 2:20 chungah, “Khrih ah ka thi cang,” a ti. Paul lawng silo in misual dihlak Khrih ah thah chih kan si cang. (1 Kor. 1:30; 2 Kor. 5:17, 18; Rom. 5:16-18). Khrih he vailamtahnak i thahchih kan sinak a ruang cu sualnak sal kan si tinak hnga lo caah a si. (Rom. 6:6). Vailamtahnak i Khrih ah thahmi cu sual le sualnak kha silo in misual kha a si. Cucaah kan nun chung paohpaoh cu thah lomi sual le sualnak cu a nung peng ko lai.

Sihmanhsehlaw misual thah a si cang nak kha kan i nunpi awk a si. Kan chunglei in Sual duhnak a thawh tikah siseh sualnak he kan i ton caan paoh ah siseh, “Ka thi cang,” tihi kan i nunpi awk a si. Paul nih, “Nifatin in ka thi,” (I die daily) a ti. (1 Kor. 15:31). A thi lomi sual duhnak a thawh tik caan paoh le sualnak he kan i ton caan paohpaoh ah kan thih cang nak kha a hman in hman awk a si. Kei tu cu Bawipa Jesuh Khrih vailam lawng hi kaa porhlawtpi ko lai, zeicahtiah Khrih vailam thawng hin vawlei hi ka caah a thimi thil a si cang i kei zong hi vawlei caah cun a thimi ka si ve cang. (Gal. 6:14). Rev. Dr. Benjamin Khamh Bawi

Leave a Reply