KHRIH LE TRINITY CU BAIBAL HLUN CHUNGAH THUHMI/BIATHLI (MYSTERY) A SI.
Mirang nih MYSTERY anti i, David Van Bik nih cun BIATHLI tiah Laiholh in a leh. YSTERY sullam cu KHUHMI, THUHMI, BIATHLI tinak asi i, Cu THUHMI BIATHLI cu Pathian nih a Phuan (Reveal) hlan chung pauh cu theih khawh le i fian khawh taktak asi lo.

Micheukhat nih “Ziah Baibal hlun OT ah TRINITY Pathian hi a lang lo” tiah biahalnak a um tawn. A ngaingai ti ahcun Pathian nih Asining taktak hi OT ahcun A THUH (A KHUH) caah Pathian sining le a kong hi fiang taktak in theih khawh a rak si lo. Israel (Jews) nih PATHIAN BIATHLI (MYSTERY) kha an zumh lo ruangah Jesuh cu cu an cohlang kho hrimhrim lo. Pathian nih a BIATHLI asi mi KRIH cu Taksa in a phuan zongah Jews nih cun an cohlang kho lo.

Cuacaahcun TRINITY kan timi Pathian Asining taktak le KHRIH cu Baibal Hlun ahcun THUHMI (Biathli) asi caah BAIBAL HLUN hmuh ning le Jews ruahning ahcun TRINITY cu pemh khawh lomi asi. Sihmanhseh law Cu BIATHLI cu Pathian nih BAIBAL THAR ah PA, FA le THIANG THLARAU in a phuan cang.

KHRIHFABU (CHURCH) Zong hi Baibal hlun ahcun THUHMI (BIATHLI) asi. Sihmanhsehlaw Pathian nih a Thuhmi (Biathli) cu Lamkaltu hmangin Pathian nih a phuan tikah fiang tein kan hngalh khawh. KHRIH CU THUHMI BIATHLI (Mystery) ASI.

Kolosa 1:26 “Cu a biathli cu kan hnulei chan chung vialte Pathian nih a thuh i atu i a mi hna sin i a phuanmi hi a si” EFESA 1:8 “Pathian nih a fimnak le a thil hmuh khawhnak in a rak i timhmi cu a hun tuah i Khrih thawngin tlinter a timhmi a khuakhannak a rak i THUHMI kha kannih cu a kan hngalhter cang. Eph 3:3-4

“Pathian nih a thuhmi a khuakhannak cu ka sinah a phuan i a ka hngalhter. (Hi kong hi tawi tein nan sinah ka rak țial cang, ka țialmi kha nan rel ahcun Khrih biathli ka hngalhnak kha nan hngalh khawh lai.)” Kol 2:2″…..Cun annih nih Pathian biathli cu an hngalh lai i cu BIATHLI cu KHRIH kha a si ko” Eph 5:32 “Hi Cathiang bia nih hin a langhtermi BIATHLI (biatak) a um i cucu KHRIH le khrihfabu kong kha a si tiah ka hngalh”

1Tim 3.16 Kan biaknak phung chung i aa THUPMI BIATHLI hi zeitluk in dah a ngan ti kha ahohmanh nih an al kho lo: (Cu Biathli asimi KHRIH cu) Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai (1Tim 3:16 nih BIATHLI a timi cu Pa Pathian kha siloin KHRIH Jesuh kha asi. Cucaahcun, 1Tim 3:16 ah TAKSA in a rak langmi cu KHRIH JESUH (Biathli) kha asi JEHOVAH asi lo tihi kan i fiang awk a si. (Mirang King James nih GOD tiah leh aa palhmi kha i chirhchan ding asi lo)

DONGHNAK Pathian nih a thuhmi Biathli KHRIH cu a phuan cang. Pathian nih a sining aa phuang cang. Parhian a sining aa phuan mi cu…PA, FAPA LE THIANG THLARAU (TRINITY) in aa phuang. Pathian Biathli a zummi nih Nunnak an co lai. A hlawt mi nih Jews batukin tandatnak an huah lai.

Holy Bible nih Pathian thuhmi biathli cu tling cikcek tein a phuan cang i BIBLE ah a tling cang. Pathian nih Thuhmi buathli dang a ngei ti lo. Cucaahcun Profet phunphai hna nih PATHIAN BIATHLI ka theih a ka chimh an ti ahcun LIH Biathli asi cang ti kha i fian ve a herh… Heb 1:1-2

Hlan ah cun Pathian nih kan pupa hna sin i bia a chim tikah profet kha a rak hman hna i a cheuchum tete le phun dangdang in a chimning cu a rak si. Sihmanhsehlaw atu kan chan, chan hmanung bik a simi chan ah hin cun, kan sinah a FAPA in a bia cu a chim (cang).” Cattialtu: Israel R. Thang