Khampat Kahdohnak Ah Ralhrang 10 Leng An Thi, Hriamnam Phun 17 An Laak

Chin News

Sagaing ramṭhen, Tamu peng Khampat khuapi lei ah rallam a sialmi SAC ralkap le tualchung hriamtlai ṭangṭi phu kar kahdohnak ah ralkap 10 leng an thi i ṭangṭi phu nih hriamnam phun 17 an laak khawhnak kong NUG Ministry of Defence sin in theih a si.

Sagaing ramṭhen, Tamu pengkomh, Khampat khuapi lei ah SAC ralkap 200 hrawng rallam sial in a kalmi le tualchung hriamtlai ṭangṭi phu cu nihin December 16 zinglei ah an i kap i ralkap hruaitu pakhat telh in minung 10 hrawng an thih pinah SAC lei cu hnu an tolh.

Cu kahdohnak ah cun ṭangṭi phu nih MA-10 RPG 7 meithal 1, MG-3 meithal 1, MA-S1 MK2 meithal 1 telh in hriamnam phun 17 an laak khawh, tiah NUG ministry of defense nih an thanh. Khampat khua pawng kahdohnak ah cun Sagaing ramṭhen PDF in Special Battalion, pengkomh Battalion, Pah-Kah-Phah, RCDF le CNDF hna an ṭangṭi, tiah NUG Ministry of Defence nih an langhter.

Thawngdang: Chin ramkulh,Paletwa khuapi um SAC ralhraang sakhaan hna le palek sakhaan hn cu AA nih tuk i laak an timh timi thawng a len caah Paletwa khuapi chung um mi cheukhat cu a himnak hmun ah an zam tiah theih a si.

Paletwa khuachung um mi SAC Infantry battalion 289 sakhaan le  palek sakhaan hna cu Rakhine ralkap AA nih December thla chung ah an tuk lai timi thawng a len caah khuapi chung um micheukhat hna cu khuapi lei ah le khuate lei hna ah an tli zam cia hna tiah theih a si.

“AA nih paletwa a tuk lai timi bia cu SAC ralhraang sin zong in theih a si i an mah AA he aa naihniam mi hna sin zong in theih a si caah kan i hrial cia bia a si.phaisa ngei deuh mi cu Yangon lei hna ah an kal,phaisa a ti kho deuh lo mi hna cu khuate lei deuh um mi mah le chung le theihhngal deuh sin ah kal cio a si ko” tiah Paletwa khuami pakhat nih Zalen ah a chim.

Cu thawngpang a len hnu ah SAC nih khuami hna a himnak zam ding ah tiin December 8 ah nikhat lam a awn piak hna tiah theih a si i paletwa khua um SAC sakhaan le palek sakhaan um mi hna cu raltuk ding in timhcia tein an um hna tiah theih a si.

Leave a Reply