2020 US CENSUS AH CHIN TI DING: Kum 10 dan poh ah US milu relnak “US Census” an tuah lengmang. Tu kum 2020 hi an tuah ṭhan lai i March thla hin census tuah ning kong hi zapi sin ah ca an kan kuat lai. Hi census kong hi thil biapi ngai a si caah US um Chinmi zong nih thil biapi ngai ah kan ruah ve a herh. Cucaah US census tuahnak kong ca an in kuat hna tikah tlamtling tein tuah-phit khawh rak i zuam cio te hna u sih. US citizen a si rih lomi ralzam permanent resident le phung ning lo i a ummi zong nih tuah dih dingmi a si. A ruang cu, census tuahmi kong “data” hi president tel in mi zei hmanh nih zoh khawh le hman khawh a si lai lo. Him taktak in an fim-chiah lai.

US census an tuah channak a ruang bik cu US ram chung ah minung zeizat sat dah kan um i khua zei ah dah an um hna ti hngalh duh ah a si. Phun dang i chim ah cun, US milu zat le state, county le city tbt. cio tiang i minung a ummi zat hngalh khawh i an milu tlawm le tam ning hoih cio in cozahpi nih a herhmi phaisa (budget) pek cozah zung sizung sianginn le lam tbt. vialte tuahpiak ding khi a si. Kan umnak cio state- county- district- township le city ca ah a biatukmi a si. Tahchunhnak ah Indianapolis ah Chinmi thong 20 deng kan um nain US census an kan tuahter mi pakhat hmanh nih nan tuah lo ahcun miung thong 20 deng caah cozahpi (Federal) nih an pek ding le tuahpiak dingmi phaisa million tamtuk man hi Indiana state le khua le minung nih an hmu lai lo. Kan sung ko lai.

US census i siningṭial tikah min le umnak khua lawng si lo in miphun min (race, national) ṭialnak zong a um caah miphun min tialnak ahhin BURMESE tiah ṬIAL LO in CHIN ti ding a si lai. Burmese-Myannar min hmang in rian a ṭuanmi bu (Organisations) pawl nih miphun zawn ah Burmese tiah ṭial dingin thawng an zamh lenmi a um. Chinmi nih Burmese i ti a herh hrimhrim lo. Chin bak i ti ding a si ko tiah kan umnak khua le hmun cio ah ruahnak i cheu cio hna u sih.Kan umnak cio ah lungrualte le ralṭha tein Chin ti hi hmang ko hna usih. Ref: The Chin Voice