Cattialtu Chelsea Bawi: 𝐂𝐚𝐩𝐢𝐭𝐨𝐥 𝐋𝐮𝐡𝐡𝐧𝐚𝐰𝐧 𝐚 𝐓𝐨𝐧 𝐡𝐧𝐮 𝐢𝐧 𝐃𝐞𝐦𝐨𝐜𝐫𝐚𝐭𝐬 𝐧𝐢𝐡 𝐓𝐫𝐮𝐦𝐩 𝐀𝐯𝐨𝐢𝐡𝐧𝐢𝐡𝐧𝐚𝐤 𝐓𝐚𝐳𝐚𝐜𝐮𝐚𝐢 𝐚𝐧 𝐓𝐢𝐦𝐡: Lih in vote firnak kong a chimmi nih US Capitol hnahnawh dingin misualpawl an taw a sawh hna, tiin zumh a si caah Friday in khan Congressional Democrats nih Trump avoihnihnak tazacuai dingin timhlamhnak an ngei.

Trump nih a President dirhmun in thilh colh dingin Vice President Mike Pence le Trump a cabinet pawl nih karhlannak an tuah duh lo a si ah cun, avoihnihnak tazacuainak tuah colh dingin House of Representative Speaker Nancy Pelosi le Senate Majority Leader Chuck Schumer telhchih in Democrats hruaitu pawl nih an duhnak an langhter cang hna.
“President i tih a nungmi le dohdalnak duhnak lungthin he a cawlcanghnak zohtik ah a office in tumter colh awkah ai tlak, ti an langhter. Tutan ramhnak hi Trump nih a thokmi a si,” tiin Thursday chunhnu ah khan an chim. A rian in i dinh seh, tiin awaan a tamtuk cang caah, ‘minung 5 nunnak tiang a liam phahnak tutan Capitol ramh a tonmi hi ka hnon bak ve,’ tiin Thursday ah khan Trump nih video in a thlah colh ve.

Nov. 3 election a sunghmi ruangah Republican President i a caan hi tlawmte lawng a tang cang caah, cozah thar kut ah tluangtein rian i apnak tuah dingin a chim ruagnmang ve cang. Biden hi Jan. 20 ah President biakamnak tuah ding a si. Thursday i Trump biachimmi le Biden buancomi namhnehnak tuah dingin Congress meeting a tuah lio ah Capitol lei ah ra cio dingin Wednesday i mipi a forh hna he khan cun ai van vawlei cang. Misual pawl nih cun Capitol inn cu an ramh, police pawl an iap hna i, lawmakers pawl an himnak dingah cozah tiangin i thlaak hau dirhmun an phan.

Capitol police pakhat zong a hma a fah caah a thi beh. Duhlonak a langhtertu minu pakhat zong faak ngaiin meithal hma a pu. Minung pathum cu an thlop hna lio ah an thi. US political party ngan 2 an headquarters ah pipe bomb a tarhtu kong a theimi paoh cu $50,000 pek dingin FBI nih an thaap. Lunghrimhmi minung pakhat hi kuthruk le lukhuhngei angki ai aih i, thilri pakhat ai ken lio hmanthlaak in FBI nih an hmuh.

𝐀 𝐂𝐚𝐚𝐧 𝐚 𝐮𝐦 𝐭𝐢 𝐥𝐨 𝐦𝐚𝐰 𝐬𝐢? Trump a term a dihnak dingah zarh 2 hrawnglawng a um cang caah, cu chungah tazacuai manh a si lai le si lai lo ai fiang lo. Hi kongah Pelosi nih a biachahmi kong a chim rih lo. Wednesday thil a cangmi chirhchan in kanmah Democrats lutlai pawl nih tazacuainak tuah kan i tim, tiin news conference ah cun a chim ta.

The House ah tazacuai a si ah cun, Trump hi Republican nih an ukmi Senate ah a kongceih a si lai i, cucu Jan. 19 hlan chungpaoh cu tuah khawh a si, tinak a si. Trump taza an cuainak capar hi The House nih hei namhnehpiak ko hmanh ah Mitch McConnell nih tawlrel a timh ning kong a kan chim rih lo, tiin a bawmtu hna nih an chim. Biden kong hlathlai dingin Ukraine president Trump nih deiret a chanh, tiin Democrats nih 2019 December ah khan taza an rak cuaibal cang. Republican ukmi Senate nih cu tazacuainak cu 2020 February ah an thlaakpiak. US tuanbia chung i President tuan lio ah tazacuai a tongmi hi minung 2 lawng an si. Asinain ahohmanh hi voihnih tiang an nolh mi a um ruam lo.

Tuesday i Georgia ah senate thutdan 2 Democrats nih an co than cang hnu in khan cun Senate zong hi Democrats kut a phang ding a si than cang. Asinain, senators thar Jon Ossoff le Raphael Warnock hna cu state nih an results an namhnehpiak hna hlan chung paoh cu biakamnak an tuah rih lai lo, ti a si. Cu biakamnak cu Jan. 22 khi an tuk. Asinain, cu nak tuan zongah tuah a si kho men. Thursday i video in biachimnak a ngeih lio ah president a tuan chungah a chim bal lo mi biafang ‘ram damnak’ timi Trump nih a vun i hman. Thursday zingka tiang kha cu election an kan firpiak, tiin a ti peng ko rih i, a sunghmi a cohlan khawhlonak a langhter peng ko rih.

Vote a tomtom in an fir, cucaah hi election results hi kan cohlang kho lo, tiin November tein khan hrihhram um lo piin Trump nih a chim peng. Vote an relmi cungah lungtlinglonak langhter in Trump campaign le a minung pawl nih tazacuainak 10 lenglo an kalpi ko nain, a ningpi ti awk in state baiceihzung le federal biaceihzung nih an hnonpiak dih hna. Trump biachimmi dirkamh dingah zeibantuk tehte hmanh a um lo, tiah election officials pawl nih an chim.

President nih a office rian a thlah duh lo a si ah cun US Constitution’s 25th Amendment ningin President a si nak in thilh khawh a si, tiin Pelosi le Schumer nih Pence le Trump a Cabinet an chimh hna nain, Pence nih a cohlanpiak duh hna lo. Trump hi a chuah hrimhrim a hau, tiin Republican lei in Marlyland Gov. Larry Hogan le US Representative Adam Kinzinger nih an duhnak an chim. Republican dirhnak kongah biapi ngai a si mi the Wall Street Journal editorial page zong nih Thursday ah khan Trump a rian in i phuak seh, ti an duhnak an langhter.

Capitol an ramh mi an lung a tlin lo tuk caah Trump cozah officails rengsang pawl le Cabinet member 2 an rian in an i phuak hna. Cu hna cu McConnell nupi transportation secretary Elaine Chao le education secretary Betsy DeVos an si. Attorney general caah ai thimmi minung theihternak a tuah lio ah Capotal ramh a tonmi kongah Biden nih Trump cu sual a phawt ngaingai nain, a rian dinhternak kong cu a chim lem lo.

Thursday ahkhan Congres nih Biden buancomi cu an namhnehpiak cang. House Republicans lakin hnarcheu lenglo, cun Republican senators 8 nih Trump lei tangin state election results cohlan lo dingin vote an thlak. Lung a hmun ngaimi advisers mi tlawmte a tangmi lakin Trump cu ai tawm diam i, Biden buancomi namhneh kho lo dingin Congress kham a fialmi Pence bantuk pawl cu zumhawk a tlaklo mi pawl an si, tiin a vun phomh hna.