𝗧𝗥𝗨𝗠𝗣 𝗖𝗔𝗔𝗛 𝗩𝗔𝗡 𝗔 𝗖𝗜𝗠! 𝗧𝗿𝘂𝗺𝗽: 𝗚𝗲𝗼𝗿𝗴𝗶𝗮 𝗮𝗵 𝗩𝗼𝘁𝗲 𝟭𝟭,𝟳𝟴𝟬 𝗛𝗺𝘂𝗵 𝗞𝗮 𝗗𝘂𝗵 𝗹𝗲 𝗦𝗶! “Ka sunghmi a khupthal lehpiak than dingah zaa lakin vote ka damhkhaanpiak law ka duh ko,” tiin Saturday i suimilaam 1 chung phone in a chonh lio ah Trump nih Georgia Secretary of State Rep. Brad Raffensperger cu a fial. Cu bantuk tuahsernak cu nawlngeihnak (power) ningcanglo in a hman pinah, sual nganpi a buar bantuk a si, tiin legal scholars pawl nih an chim.

Kan fial bangin na tuah lo ah cun, na tuar te lai, tiin phone chungin cun Raffensperger cu Trump nih a hrocer. An i chonhmi vialte cu record ah a um dih ti a si.𝐏𝐡𝐨𝐧𝐞 𝐜𝐡𝐮𝐧𝐠𝐢𝐧 𝐜𝐮𝐧 𝐓𝐫𝐮𝐦𝐩 𝐛𝐢𝐚𝐜𝐡𝐢𝐦𝐦𝐢: Raffengsperger le a office’s general counsel nih an cohlan duhlonak kong an langhter ve i, Georgia i vote 11,779 in Biden nih Trump a tei mi hi a dikmi le ai ningcangmi te a si ko, tiin a al. An biaalnak cu Trump nih a cohlanpiak duh hna lo. “Georgia mipi an thin a hung, kan chung mipi an thing a hung. Vote a zat rel than hi a palhnak a um tung lo,” tiin Trump nih a leh hna.

“Si ko, President. Asinain, a tu i challenge nan tuahmi ah nai hmanmi date hi a palhmi a si,” tiin Raffensperger nih a leh. “Asiah cun vun zoh hmanh. Ka duhmi tham cu hihi a si. Vote 11,780 hmuh chap ka duh, zeicahtiah hi state ah hin buan a co mi hi kanmah kan si,” tiin Trump nih a leh than. Cu ti a si ah cun, hawile hna, zeidah kan tuah ne kun lai? Vote 11,000 te lawng ka herhmi a si. Kawile hna, vote 11,000 te lawng ka herh. Teinak ka pe ko u” tiin nehhnu ah a ti than hna.

Tutan phone in an i chonhbiakmi zoh tikah, Trump nih a sunghmi a cohlan a duh lo nak kong le, a sunghmi a khuptal vun leh i President office ah thut a duh peng rih, ti a lang. Georgia ah ka sunghmi hi a si kho lo mi a si. Cucu a si kho bak lo. Vote thong za tamtuk in kan tei ko cu ta, tiin Trump nih a tu le tu phone chungah cun a nolh. Phone a chonh lio ah line a ongmi official tampi an um ve. White House Chief of Staff Mark Meadows le Cleta Mitcheel zong an i tel.

A liamcia thla 2 lio i Raffensperger office nih thawng a thanhmi pawl hi a diklo mi lawngte an si i, President aiawhin election challenge a tuahtu nih kan chimmi biaka hi cu nihin tiangin ai khat dih. Nan relmi number a palh, tiin nan kan timi record vialte vun kan piah, tiin Mitchell nih Raffensperger cu a hei hro. “Cabuai tang ballots an thuhmi, ai rawkmi ballots, state dang minung nih Georgia ah vote an pekmi, mithi nih vote an pekmi le a dangdang kong i biahalnak kan chuahpimi vialte hi Raffensperger nih a kan let duh lo, a let zong a kan let kho fawn lo. Chim ding zei a ngei lo” tiin Sunday ah khan Trump nih a tial.

President Trump, upatnak te he in chim ko ning law. A tu na chimmi hi a dikmi an si lo, tiin Raffensperger nih a leh. Cu ti phone i an i chonhmi vialte cu hlathlainak tuah dingin top Democrats lei timhlamhnak an ngei. “Phone chung i Trump biachimmi hi calcantuk bia a si. US president i a nawlngeihnak ningcanglo in a hman bia a si,” tiin Georgia i campaign a tuah lio mi Vice President-elect Harris nih a chim.

“Tutan phone record an tuahmi ah hin Trump nih American kan democracry a sersatnak biaka lawngte a khat” tiin Biden top campaign sihi Bob Bauer nih a chim. Tutan phone call kongah Republicans pawl daite an um hna. A tu bantuk in Trump nih Raffensperger daireet a chanhmi hi Nov. 3 election a phichuak lehthlen dingin a nehhnungbik cawlcanghnak a tuahmi a si. Tuan ah khan Michigan Republican state leaders pawl White House tiang a auh bal hna. Cun Georgia Gov. Brian Kemp (R) zong phone in a hei chonh i, state electors pawl an minung thlen dih dingin a chimh. Cun Pennsylvania i a sunghmi a khupthal lehter dingin Ps. House of Representatives speaker zong a chimh.

Wednesday i Congress nih hmunkhat tonnak caan an i ngeih te tikah anmah Republicans lakah Biden dirpi ai timmi an tam chinchin cang caah, a tu bantukin phone in heh tiah tan a laak hi a si. Biden buancomi lehthlen dingah Republicans nih zaalakin vote an i ngeih ti lo nain, election phichuak ralchanh in duhlonak langhter dingin Washington lei ah amah a tanhtu pawl lam zawh dingin Trump nih a forh hna. Capitol lenglei ah federal officials pawl an buai ur cang.

Vote ka herhmi zat nan ka kawlpiak khawh lo citcet ah cun nanmah tu hi misual ah chiah nan si te lai, tiin phone in cun Trump nih Raffensperger le Ryan cu a hro hna. “Hi thil hi sualnak phunkhat dawh a si cu. Cucaah hi thil hi na onh awk a si lo. Nanmah ca le na sihni Ryan ca zongah tihnung a si,” tiin Trump nih a ti hna. Tuesday tiang i nan cawlcangh khawh lo ah cun Goergia an senate thutdan ai cuh than dingmi David le Kelly caah thil harsa ngai a si lai, tiin a chimh hna.

Monday ah khin Dalton, Ga. ah vote firnak kong chim kai tim, tiin Trump nih a chim. “Election ngan taktak tuah ding kai ngeih rih. Hihi President cung i nan tuahsernak ruangah a si. Tukum election dehhlen a ton hi Georgia mipi nih nan theihmi te a si. President cung i nan tuahsernak ruangah hin mi tampi nih vote an pe lai lo. President cung i nan tuahsernak a thatlo ruangah Republican tampi nih president ralchanh in vote an pek te lai. Sikolo maw? An huat bak. Ka ralchanh in vote an pek lai. Election hlan ah hihi nan vun dinter (straighten) kawh a si ah cun upa nan co ngaingai ko lai,” tiin Trump nih a chim.

A tu bantukin vote damhkhanter dingin le vote kongah hlathlainak tuahtu ding minung rian fial dingin Trump nih Raffensperger rian a fialmi hi, Georgia i election phichuak a duh paoh in vun tawlrel seh, ti a duhmi ko a lo, tiin legal scholars pawl nih an chim. Rian a fialmi a tuah a tlolh a si ah cun, hlathlainak tuah dingin Justice Department hi a fial te khawh mi a si.

President nih hin kan election a dikfelnak voivonh dingin state officials pawl rianfial a timh hna, asiloah ‘ka chimmi hi a dikmi a si, tiin i zumh ding tiangin maw a thlauk ai rawk cang le dek a si hnga, tiin NY University prof. Richard H. Pildes nih a chim. Asinain, Trump a sualpalhnak hi office lei thil nakin, a lungput he ai pehtlai deuhmi an si hna. Kan state officials pawl hi a president nawlngeihnak hmangin, election fir puh hna i, cu in cun a president office hi i tlaih peng ai tim, tiah Richard nih a chim.
Tazacuainak an tuahmi le biahalnak an chuahpimi pawl hi ai thupnawkmi an si caah Trump nih illegal nunphung le ziaza a kalpi le pi lo hi tehte langhter a har ngaimi thil a si. Asinain tutan phone call i a chimmi vialte hi cu ai ningcang ruam lo, cun zoh a chiat pinah midang thin a phawh ngai ko lai, tiin Ohio State University Prof. Edward B. Foley nih a chim.

Trump hi emergency meter tiang a lamh cang. Cuhlan ah cun 12 scale of 1 to 10 kan si nain atu ah cun 15 tiang kan phan cang, tiin Foley nih a chim. Phone chungah cun a dirhmun a dik zia langhter duh ah a tu le tu vote kong i thawngpang diklo le vote firnak kong cu a chim. Vote 500,000 lenglo hi Georgia ah ka hmuh, tiin a chim. Mithi a thongthong nih vote an pek. Biden caah vote 18,000 hrawng hi Atlanta election workers pawl nih scan voithum tiang an tuahpaik. State a chuahtaak cangmi hna zong a thongthong in an ra than i vote an hung thla hna tiin a chim.

Cucaah Brad, zeidah kan tuah awk a si, vun ka chim tuah ngat? Election hi kanmah tei a si. A tu bantukin kan kut chung ta an kan chuh thanmi hi a phung a si lo. Hi bantuk cawlcanghnak hi a lam tampi ah fahnak an tong te lai. Cucaah hi kong hi na vun tuaktaan than a hau lai. Asinain, cu ti tuaktaan thannak na tuah tikah, a phi theih a duh lo mi hna he si lo in, a phi theih a duhmi hna he tuahti dingin kan duhpiak, tiin Trump nih Brad cu a chimh.

Phone ah cun Trump hi a holh bik a si i. A thin a hung, a thin a tawi. Atlanta i vote firnak kong a tomtom in a um mi an hmuh kho lo, tiin a ruah hna caah Raffensperger cu ‘hngakchia bawlraw’ tiin a auh, cun law enforcement officials pawl zong cu mi dikcak lo, asiloah mi a dironh ngamlo mi nan si’ tiin a ti hna. Kemp bantuk minung ka cuaisanmi hi cu mihrut bak ka si, tiin Trump nih amah le mah ai mawhchiat len. Tutan i an thim thanmi hi ka khuaruah lei a har. Kemp kongah cun hi vailte si ko rih ne seh, tiin Trump nih a chim.

Vote firnak a um lo, tiin cohlan dingin Raffensperger nih karhlannak a tuah ruangah Democrat Stacey Abrams le a dang Democrats pawl an hlawh a tlin phah viar cang, tiin Trump nih a chim. “Stacey nih an nihsawh salam cang hi aw, kawi Raffensperger. ‘Hi hna rual hi lungtum nakin an hrut deuh’ tiin dawh heh tiah bia a thlah cang hi. Kan chimh la, kan party cung i hi nu nih a tuahsernak hi zumhawk lei thalo in dawh a chiatkhat hih,” tiin Trump nih Raffensperger cu a chimh.

“President aw, social media pawl he buaibainak na ngeihmi hi zoh than hmanh annih cun zeipaoh a chim kho dawh an si cu,” tiin Trump cu a leh. “Hihi social media a si lo. Trump media a si. Social media a si lo. A si hrimhrim lo. Social media a si lo. Social media hi zeihmanh ah ka rel lo. A zeite hmanh ah ka rel lo,’ tiin Trump nih a leh. Vote voi 3 tiang scan an nolhmi hna pei a um cu. Brad, zeiruangah dah vote cu voi 3 tiang an khumh than le? Voi 3 khengte tiang scan an tuah hna cu ta, tiin Trump nih a chim.

“President, cu ti cun an tuah lo dawkaw. Audit kan tuah ko i, voi 3 tiang scan an tuah lo, tiin biatlang kan kawm ko cang,’ tiin Raffensperger nih a leh. Trump cu mi min hna a vun i palh cukmak ve i, Kemp hna cu George ti hna in a auh. Georgia i Biden buancomi le, Senate runoff kongah a phunphun in a chim i, Tuesday an tuah dinginmi senate zuamnak cu thaizing tuah ding pungsan rumro in a chim fawn.

Mr Germany hi bia an i ruah ko ah hin Trump nih langhngan tein a nawl hna nak a lang. “Fulton County ah ballots an fir ti na ruat maw? Zeicah tiah cucu biachawk vai ka teihmi a si. Cun Dominion company zong nih machines pawl a lak hna, ti a si. Dominion hi an hmanhmi seh laak dingah a khul a rang ngai. Cu kong cu pakhat tal na thei el maw? Zeicahtiah cu bantuk cawlcanghnak cu phungbuar a si, si ko lo maw? tiin Trump nih Mr Germany cu a hei chimh.

Fulton County in zeibantuk machine hmanh Dominion nih a laakmi a um lo, tiin Germany nih a leh. Asiah, machine a chungril lawng laak in a dang hna an thleng el maw? tiin Trump nih a hal than. An thleng lo, tiin Germany nih a leh. Na fiang tak maw aih? tiin Trump nih a hal than. Ka fiang ko. Ka fiang ko, President, tiin a leh. Tutan phone chonhmi zoh tikah Trump kiangkap ah a lihchimmi a dirkamhtu tampi an um, ti a lang. Georgia ah mithi 5,000 lenglo nih vote an pek, tiin Trump nih a chim i, ‘2 lawng an si’ tiin Raffensberger nih a leh.

2 nak tamdeuh an si hrimhrim lai, tiah ka chim ngam bak, tiin Meadows nih a vun nolh ve. Vote fir a um le um lo zohfel dingin data kan in halmi hna a pek na kan duh lo. Trump nih teinak ai hmuh khawhnak dingah a zatawk a si mi vote 24,000 illegal votes a um lai, tiah kan lung a hring, tiin Trump sihni Kurt Hilbert nih Raffensperger cu a soisel ngaingai.

Thawngpang hi thanh lo a si ah cun cucu thil pakhat khat thuhmi a um, tinak a si. Cute cu kan i buaipimi cu a si, tiin Hilbert nih a chim. Trump i phone chung a biachimmi tam u kongah Mitchell nih a ruah awk a theihlo nak kong a chim. Biden caah vote 18,000 voi 3 tiang an relpiak i an fonh dih, tiin Trump nih a chimmi he pehtlaiin, Raffensperger a office nih zeibantuk data hmanh a kan hromh duh ve lo caah, a ruah awk ka thei lo, tiin Mitchell nih a chim.

Nan i ngeihmi records hi kan kut a phan bal lo cu ta, tiin Mitchell nih a chim. Asinain, vote kong i thawngpang tam u hi cu midang sinah data hrawm lo dingin state law a um, caah a si, tiin Mr Germany nih a chim. Tazacuainak kongah ka sihni cheukhat he thuti law kan duh, tiin Trump nih Mr Germany cu a fial i, anih zong nih a cohlanpiak ve. Tutan kan chonhmi hna hi san a tlaih lai ka zumh lem lo, tiin Trump nih Raffensperger le Germany cu a ti ta hna.

Germany, zeiruangah dah hi kong hi dothlat nan duh lo hi a si e? Nan zei ko hme ti le? Na sihni hi a khong ngai ti cu ka theih ko, asinain nangmah zong cu sihni tha ngai na si ti ka zumh ko. Min donghnak thate zong nai ngeih ko, tiin Trump nih Germany cu a ti. Suimilaam 1 chung hrawng an i chonh a dongh lei ah khin, cuhlan bantuk tein cun “Mr President, caan na ka peek caah kai lawm” tiin Raffensperger nih a chim. Credit: Chelsea Bawi