Atulio cu Covid-19 rungah vawleipi a hung buai ngaingai. An kan tlunh ve sual lai tiah thinphang nga cio in kan um hna. Kan ralrin ngaingai cio a herh hna. Aruang cu a tuni tiang a damnak sii hmuhchuah a si rih lo.

Vawlei cung mifim thiam zong nih an kawl len nain an hmu rih lo. Cucaah iralring cio hna u sih. President Donald Trump nih atulio zawtnak vawleipi a buaiter cuahmahtu zawtnak ṭihnung Covid-19 zawtnak konghe pehtlai in China nih hi zawtnak hi a bu ko buin hramhram in a karhtermi a si ah cun fak ngai dantak a si lai tiah a chim.

Trump nih Covid-19 zawtnak kong he pehtlai in China cozah cawlcanghning cu ahlan te in a rak soisel cang i US nih rianṭuanpi tlak an si lo tiin a rak ti lengmang tawn. Hi zawtnak hi zeitindah akarhning a si timi thei ko buin hibantuk rian an ṭuan i an cawlcangh ahcun an tuar ze hrimhrim lai. An rianṭuan ṭhat lo man cu an hmuh ve hrimhrim lai tiah White House i News Conference tonnak an ngeihnak ah Trump nih cun a chim.

Trump nih a chim rihmi cu Coronavirus zawtnak hrik a um hlan ah cun China he kan i pehtlaihnak hi a ṭha ngaingai. Asinain rianrang tukin thil umtuning aithleng tiah a chim. A peh rihmi cu China cungah hin na thinhung tuk maw zeitindah na tuah lai ti biahalnak zong tampi a um asinain thil umtu ning zohchih in a si ko lai tiah a chim chap.  Covid-19 zawtnak hi thil pakhat khat an sualnak ruangah a chuakmi i kilven manh loin a karhmi le theih cuahmah ko buin karhtermi cu aidang tukmi thil a si tiah Trump nih cun a chim.

Hitihin a si ko bu ah tuan tein i hmaithlak ve kan i timh ahkhan an rak kan onh ding a si. Asinain nawl an kan pek lo an kan onh lo thil ṭha lo taktak a si ti an theih i an i zahpi tiah keimah nih cun ka ruah tiah Trump nih cun a chim.