Atu lio ngaihchiatnak kan tongmi le kan lungfah ngaimi thil pakhat cu tlangval Dal Mun Mang tihnak kong hi a si. Tlangval thihnak kong he pehtlaiin mipi an lungtling lo i an lungfaak ngaingai i Kalay Pituh sizung rianttuantu Siibawi pawl mawhchiat an si.

Tuni January 29, 2020 ah Kalay Pituh Siibawi pakhat nih tlangval Dal Mun Mang thihnak kong he pehtlaiin chim fiannak a ngeih. Kalay Pituh sizung i siibawi rianttuantu Dr. Aung Myo Win nih a chimmi cu ” Ahmasabik chim ka duhmi cu ngaihchiatnak a tongmi innchungkhar hna kan in tuarpi hna i kan in ngaihchiatpi ve hna ti hi a si. Sizung i a um chungah remcan lona ka um i a nunnak a liam cu a chungkhar he kan in tuarpi tuk ve hna.

” Thil umtu ning kan chim fian a si ahcun, January 26, zaan suimilam 11:30 ah dam lo cu palik he sizung an rak ra. Dam lo i a chungkhar ahohmanh an i tel lo i Myomah zinah a cang sual. Dam lo salai Dal Mun Mang cu theih khawhnak zong a ngei i chawnh biak khawh zong a si. Asinain, zu a ding tiin amah zohtu siibawi nih a chim. Dam lo (mizaw) cu hlainak khan ah chiah a si i tuanvo ngeitu hna nih a herhmi an tuahpiak.

Dam lo (Dal Mun Mang) cu kan zohfel tikah thil a theih khawh ko i a thisen zong a ttha ko. A thisen kan zoh tikah a ttha i thisen pek tiang haumi dirhmun a dir lo. Hlai (operation) tuah aherh sual ah tiin a herhmi kan zoh fel dih i a thisen zong ”O” a si. Dam lo (Dal Mun Mang) hi a thluak chungah thisen a lut nain thisen pek ahau lo. CT scan lak dingin a thaizing suimilam 2 ah caan kan hngak. Cu hlanah a herhmi sii le ai zong kan pek. A thaizing January 27 zinglei suimilam 8 hrawngah dam lo(Dal Mun Mang) i a nu a rak phan. Dal Mun Mang a nu cu thil sining vialte kan chimh dih.

Dal Mun Mang cu ruah lo piin a hung zual hmasa ngaingai i aherhmi sii-ai din ding pek asinain January 27 chun suimilam 1:55 ah a nunnak a liam. A thihnak aruang cu a lu a rak i khawnmi a fak tuk i a thisen a kho rungah le a thluak thahri a cah ruagah a si. A tawinak in chim ahcun a lu a khawnmi/sawhmi a fah tuk ruangah a nunnak a liam hi a si.

Tuchun nitiang ah kan theih khawh tawkin lu a sawhmi siizungah a phanmi hi minung 10 hrawng an si i minung 10 lakah mi 8 an nunnak a liam i 2 hrawng an dam. A dammi hna zong an lung a tuk lo i an cawlcangh ningcang zong a hman lo i a dik thlu ti kan hmuh khawh.

Adonghnak chim ka duhmi cu lu i khawn ruangah a zual hma tukmi le a hma faak tukmi mizaw hna cu a ran khawh chungin tuamhlawm khawh dingin le suimilam 24 chungah hlai (operation/ah) khawh dingin kan i zuam cang lai i a herhmi thilri zong a hlutu an um cang ” tiah a chim.

 

Nawlnak theihternak

Hi kong kan ttialmi a dang Website Copy-paste nan kan tuahpiak nak lai lo kan in nawl hna.